اللہ نوں منظور ہویا تے نواز شریف 21 اکتوبر نوں پاکستان آن گے، شہباز شریف

لہور(پنجابی میڈیا گروپ)صدر مسلم لیگ ن شہباز شریف نے آکھیا اے کہ اللہ نوں منظور ہویا تے نواز شریف 21 اکتوبر نوں پاکستان آن گے۔لہور ماڈل ٹائون وچ پریس کانفرنس کردیاں ہویاں سابق وزیراعظم شہباز شریف نے آکھیا اے کہ اسیں وی سیاست نوں بچان لئی ریاست نوں ڈبو سکدے سن ایہ کوئی مشکل کم نہیں سی لیکن اسیں فیصلہ کیتا سیاست نوں نقصان پہنچدا اے پہنچ جائے ریاست بچ جائے۔سابق وزیراعظم نے آکھیا کہ پی ٹی آئی حکومت نے ذاتی مقصد لئی ریاست نوں تباہ کرن دا فیصلہ کیتا سی ، ساڈی 16مہینیاں دی مخلوط حکومت وچ چیلنج، مشکلاں تے تریخ دا وڈھا سیلاب آیا، آئی ایم ایف دا وڈھا چیلنج ساڈھے سامنے سی، پچھلی حکومت نے آئی ایم ایف دے نال شرطاں طے کیتیاں سن ۔اونہاں نے آکھیا اے کہ اک پاسے ساہنوں معاشی بدحالی ورثے وچ ملی، دُوجے پاسے لانگ مارچ تے دھرنے سن، 9 مئی نوں پاکستان تے افواج پاکستان دے خلاف بغاوت ہوئی، اوس سال کنک دی پیداواردا10 سالہ ریکارڈ اے، کپاس دی پیداوار وچ وی پچھلے ورھیاں دے مقابلے وچ بہتری آئی اے۔صدر ن لیگ دا کہنا سی کہ اسیں مسائل حل کرن لئی جان توڑ کوشش کیتی، خدانخواستہ پاکستان دیوالیہ ہوجاندا تے کیہ صورت حال ہُندی؟ ملک دیوالیہ ہوجاندا تے ایل سیز نہ کھل جاندیاں، دوایاں نہ مل رہیاں ہُندیاں، پٹرول پمپ اُتے لائناں لگیاں ہپندیاں،لکھاں لوگ بیروزگارہُندے۔شہباز شریف نے آکھیا اے کہ اسیں بجٹ وچ یوتھ پیکیج دتا، ارباں روپے دے یوتھ لان دتے، میری نظر وچ پاکستان نوں دیوالیہ پن توں بچان لئی اللہ نے مدد کیتی، نوازشریف دے دور وچ ہر سال رمضان پیکیج دتا جاندا سی، ایس سال وی رمضان شریف وچ مفت آٹے دا پروگرام دتا گیا، آئی ایم ایف سامنے ساڈھے ہتھ بندھے ہوئے سن، میں مطالبہ کیتا سی کہ 200یونٹ بجلی استعمال کرن والے اُتے بوجھ نہیں پین دیاں گے۔سابق وزیر اعظم دا کہنا سی کہ میرے قائد اگر کہندے اسیں سیاست بچانی اے تے میں 2منٹ وی انتظار نہ کردا استعفی دے دیندا، انتہائی محدود ویلا تے وسائل وچ جو کجھ وی حقیر خدمت کرسکدے ساں کیتی، اگر ملک دیوالیہ ہوجاندا تے سری لنکا توں وی برا حال ہونا سی، گھبران دی لوڑ نہیں، انشااللہ چنگا ویلا آئے گا۔