وزیر اعلیٰ محسن نقوی دا پنجاب وچ غیر قنونی وَسن غیرملکیاں دے خلاف کارروائی دااعلان

زیادتی نہیں ہوئے گی مگر غیر قنونی طور کسی غیر ملکی نوں وسن نہیں دتا جائے گا ،رضا کارانہ طوراُتے واپس چلے جان
لہور ( پنجابی میڈیا گروپ) نگران وزیر اعلیٰ پنجاب محسن رضا نقوی نے آکھیا اے کہ یکم نومبر توں پنجاب وچ غیرقنونی طور اُتے وسن والے غیر ملکیاں خلاف کارروائی کیتی جائے گی، غیر قنونی طوراُتے وسن والے غیر ملکی رضا کارانہ طور اُتے واپس چلے جان ۔نگران وزیر اعلی پنجاب محسن رضا نقوی نے طبیعت ناسازی دے باوجود شاہدرہ فلائی اوورز پراجیکٹ دا دورہ کر کے سائٹ اُتے جاری تعمیراتی سرگرمیاں دا جائزہ لئیا، اونہاں نے فلائی اوور دا معائنہ کیتا تے پُل توں شاہدرہ چوک وچ جاری تعمیری کماں دا مشاہدہ کیتا، صوبائی وزیر عامر میر،اظفر علی ناصر،ڈپٹی کمشنر تے متعلقہ حکام وی ایس موقع اُتے موجود سن۔کمشنر و ڈی جی ایل ڈی اے محمد علی رندھاوا، چیف انجینئر ایل ڈی اے اسرار سعید تے کنٹریکٹر نے منصوبے دی تکمیل بارے نگران وزیر اعلی نوں بریفنگ دیندیاں ہویاں دسیا کہ شاہدرہ چوک فلائی اوورز منصوبے دی تکمیل نال یومیہ 3 لکھ گڈیاں نوں آمدورفت وچ سہولت ملے گی