ایل پی جی دے نام اُتے زہریلی گیس فروخت ہون دا انکشاف

کراچی( پنجابی میڈیا گروپ) ملک وچ ایل پی جی دے نام اُتے زہریلی گیس فروخت ہون دا انکشاف ہویا اے۔ایل پی جی انڈسٹریز ایسوسی ایشن دے چیئرمین عرفان کھوکھر نے پریس کانفرنس نال خطاب دے دوران انکشاف کیتا کہ ایل پی جی دے نام اُتے غیر معیاری زہریلی گیس 15روپے کلو وچ امپورٹ کیتی جا رہی اے۔اونہاں نے دسیا کہ سستی گیس امپورٹ کرن دے باوجود ایہ زہریلی گیس 250 توں 280روپے کلو وچ عوام نوں فروخت کیتی جا رہی اے، مخصوص گروہ غیر معیاری ایل پی جی منگوا کے پریشر ودھان لئی ایس وچ سی او 2 مکس کر رہیا اے تے ایہ مکسنگ آئے دن حادثیاں دا باعث بن رہی اے ۔عرفان کھوکھر نے دسیا کہ ایران دیاں 5ریفائنریاں اُتے پابندی عائد اے، جنہاں دا زہریلا مواد ضائع کرن دی بجائے جعلی گڈز ڈیکلریشن اُتے پاکستان امپورٹ ہو رہیا اے، اگر ایس زہریلی گیس دی امپورٹ اُتے فوری پابندی عائد نہ کیتی گئی تے موسم سرما دے دوران یومیہ بنیاداں اُتے ایل پی جی دے نام اُتے ایس غیر معیاری گیس سلینڈراں وچ دھماکیاں دے حادثات ودھن دے خدشات پیدا ہوجان گے۔