آئی پی پی دے جلسیاں دا شیڈول تبدیل، پہلا پاور شو 28اکتوبر نوں ہوئے گا

لہور( پنجابی میڈیا گروپ)استحکام پاکستان پارٹی (آئی پی پی)نے جلسیاں دے شیڈول وچ تبدیلی کر دتی، پہلا پاور شو 13 دی بجائے 28 اکتوبر نوں خانیوال وچ ہوئے گا۔مرکزی سیکرٹری اطلاعات فردوس عاشق اعوان دے مطابق استحکام پاکستان پارٹی دے جلسیاں دی ترتیب وچ قیادت دی مصروفیت تے نویں سیاسی حکمت عملی پاروں جزوی رد و بدل کیتا گیا اے۔ نویں ترتیب دے مطابق آئی پی پی اپنا پہلا پاور شو 28 اکتوبر نوں خانیوال وچ کرے گی، جھنگ پاور شو دی نویں تریخ داچھیتی اعلان کیتا جائے گا۔استحکام پاکستان پارٹی دی سیکرٹری اطلاعات نے ہور آکھیا کہ آئی پی پی دی عوامی رابطہ مہم کسی وی صورت تعطل دا شکار نہیں ہونے دین گے، لیکن ایہ عوامی رابطے تے جلسے سینئر قیادت دی سربراہی وچ ہی کیتے جان گے۔خیال رہے کہ استحکام پاکستان پارٹی نے اپنا پہلا سیاسی پاور شو 13 اکتوبر نوں جھنگ وچ کرن دا اعلان کر رکھیا سی۔