شہبازشریف تے آصف علی زرداری دا فلسطینیاں نال اظہار یکجہتی

لہور( پنجابی میڈیا گروپ)مسلم لیگ ن دے صدر تے سابق وزیراعظم شہباز شریف نے آکھیا اے کہ اسرائیل اُتے حماس دے حملے مسجد اقصی تے مقدس مقاماں اُتے اسرائیلی کارروائیاں داردعمل اے۔اونہاں نے آکھیا کہ خطے وچ امن لئی اسرائیل دے غیر قنونی قبضے، یہودی آباد کاری تے فلسطینیاں اتے مظالم ختم کرنا ضروری نیں، اسرائیل فلسطینیاں نوں حق خود ارادیت توں محروم کر رہیا اے، معصوم فلسطینیاں اُتے ظلم بند ہونا چاہیدا، مسئلہ فلسطین نوں فوری حل کرنا ہوئے گا۔ایس دے علاوہ پی پی پی قیادت نے وی فلسطینی عوام نال مکمل اظہار یکجہتی دا اعلان کیتا اے۔سابق صدر آصف زرداری نے آکھیا کہ طویل عرصے توں فلسطینی عوام مظالم دا سامنا کر رہی اے، عالمی منصف فلسطینی عوام دی حمایت وچ آوازاُچی کرن۔اونہاں نے آکھیا کہ پاکستانی عوام دیاں ہمدردیاں تے دعاواں فلسطینی عوام دے نال نیں۔