مسکن چورنگی؛ گیس لیکیج نال اک ہور دھماکا، 3 دکاناں، گڈیاں تباہ

کراچی( پنجابی میڈیا گروپ)مسکن چورنگی دینیڑے رہائشی عمارت دی دکان وچ گیس لیکیج نال دھماکے وچ 3 دکاناں تباہ، کئی گڈیاں نوں نقصان پہنچیا جَد کہ عمارت وچ دراڑاں پہ گئیاں۔شہر قائد وچ گلشن اقبال دے علاقے مسکن چورنگی دے نیڑے رہائشی اپارٹمنٹ دی پیزا شاپ وچ گیس لیکیج پاروں زور دار دھماکا ہویا، جس دی آواز دور تک سنی گئی۔ دھماکے پاروں ہر پاسے تباہی پھیل گئی تے موٹرسائیکل سوارراہ گیرشہری سنے 4افراد زخمی ہوگئے۔دھماکے دے نتیجے وچ پیزا شاپ سنے3 دکاناں مکمل تباہ تے ہوردکاناں نوں جزوی نقصان پہنچیا جَد کہ رہائشی عمارت دی پارکنگ وچ کھڑیاں 10 توں وَدھ گڈیاں اُتے عمارت دا ملبہ جا پئیا جس پاروں کجھ گڈیاں تباہ تے کجھ نوں شدید نقصان پہنچیا۔ اپارٹمنٹس تے دکاناں اُتے مشتمل رہائشی عمارت وچ دراڑاں پہ گئیاں۔