21 اکتوبر نوں نواز شریف دا خطاب قومی نصب العین طے کرے گا، شہباز شریف

لہور( پنجابی میڈیا گروپ)پاکستان مسلم لیگ ن دے صدر و سابق وزیراعظم شہباز شریف نے آکھیا اے کہ 21 اکتوبر نوں مینار پاکستان اُتے قائد نواز شری دا خطاب قومی نصب العین طے کرے گا۔شہباز شریف دا پارٹی کارکناں دے نام جاری کردہ پیغام وچ کہنا سی کہ نواز شریف دے استقبال دیاں تیاریاں لئیمحنت اُتے ساریاں کارکناں نوں شاباش دیندا ہاں، مرد وعورتاں تے نوجوان کارکناں دا جذبہ، لگن تے پارٹی نال نظریاتی وابستگی مثالی اے، پاکستان دی کامیابی دی ٹیم تُسی او، تہاڈی دن رات دی محنت رنگ لیائے گی۔اونہاں نے آکھیا کہ پاکستان دی کامیابی اتحاد تے اشتراکِ عمل وچ اے، خطے تے دنیا وچاُبھر دیسنگین بحراناں وچ پاکستان دا اتحاد تے معاشی مضبوطی ویلے دی اہم ترین لوڑ اے، 21 اکتوبر نوں نواز شریف دی وطن واپسی پاکستان دے اتحاد و معاشی مضبوطی وَل اہم قدم ثابت ہوئے گی۔سابق وزیراعظم دا کہنا سی کہ بحراناں توں نکلن تے عوام دی توقع نوں پورا کرن وچ ہمیشہ قائد مسلم لیگ ن نے تریخی کردار ادا کیتا، اللہ تعالی دے فضل و کرم نال اک وار فیر تریخ تے اپنی سنہری روایت دہران گے تے عوام نوں مشکل توں کَڈن گے، پوری کوشش کراں گے کہ نوازشریف دی قیادت وچ سب ٹھیک کرن۔شہباز شریف نے آکھیا کہ قائد مسلم لیگ ن دی قیادت وچ اسیں ہمیشہ ملک نوں بچایا اے، اللہ تعالی دے کرم نال فیر ایسا ہی ہوئے گا، ایہ فیصلہ کن مرحلہ وی ماضی دی روایتی ہمت تے قوت نال عبور کرنا اے، تہاڈی کامیابی پاکستان دی کامیابی اے۔صدر ن لیگ دا ہور کہنا سی کہ 21 اکتوبر نوں مینار پاکستان اُتے قائد دا خطاب قومی نصب العین طے کرے گا، نواز شریف دی قیادت وچ ملک گیر انتخابی مہم پوری قوت نال چلاواں گے۔