چیئرمین پی ٹی آئی نے امریکا خلاف چورن ویچن دی کوشش کیتی، فضل الرحمان

ملتان( پنجابی میڈیا گروپ)جے یو آئی ف دے سربراہ مولانا فضل الرحمان نے آکھیا کہ چیئرمین پی ٹی آئی نے امریکا دے خلاف چورن ویچن دی کوشش کیتی جیہڑی نکام رہی۔سربراہ جے یو آئی ف مولانا فضل الرحمان نے آکھیا کہ ابہام کیوں پیدا کیتے جارہے نیں، الیکشن کل کرا دیو تے اسیں کل وی تیار ہاں، الیکشن تے ہون گے ہی ہون گے، الیکشن جنوری دے آخر وچ ہون گے تے ادھے ملک وچ تے برف پہ رہی ہوئے گی، طالباناں نے نویں نویں حکومت سنبھالی اے، ساڈھے کول وڈھا تجربہ اے،ساہنوں اپنے طریقے نال معاملات طے کرنے چاہیدے نیں۔مولانا فضل الرحمان نے آکھیا میں ایہ چنگا نہیں سمجھدا کہ کسی لئی محول کجھ ہور تے کسی لئی کجھ ہور، سب لئی الیکشن وچ اک جیہا محول ہونا چاہیدا، چیئرمین پی ٹی آئی ولوں اک غیر ضروری کاغذ چُک کے اک مسئلہ بنایا۔جے یو آئی دے سربراہ نے آکھیا کہ ووٹ نوں عزت دیو دا نعرہ اوس ویلے سی جَد خطرہ سی، جَد دشمن ہتھ بنھے ہوئے ہون تے میرے ہتھ کھلے ہوئے ہون تے لڑائی دا مزا نہیں آندا، جی ایچ کیو، کور کمانڈرہائوس، فوج دے قلعیاں اُتے حملہ کیتا گیا، پورے ملک وچ9 مئی نوں منظم حملے کیتے گئے، لیڈرشپ ذمہ دار اے۔مولانا فضل الرحمان نے آکھیا کہ پچھلی حکومت نے اسرائیل نوں تسلیم کرن دی ترغیب دلائی، معیشت بہتر کرن دا خواب اسرائیل نوں تسلیم کرن وچ ویکھدے رہے، اسلامی دنیا نوں اک جسم بن کے اپنا موقف واضح کرنا چاہیدا، دو جنگاں وچ پاکستان دی فوج اوتھے لڑی اے۔سربراہ جے یو آئی نے ہور آکھیا کہ وڈھے واضح موقف دے نال ساہنوں اپنے بھائیاں دے نال کھڑا ہونا چاہیدا اے۔