نوجواناں نوں ترقی دے کے پاکستان دی غربت گھٹ کراں گے، شہباز شریف

لہور(پنجابی میڈیا گروپ)سابق وزیراعظم تے پاکستان مسلم لیگ ن دے صدر شہباز شریف نے آکھیا اے کہ نوجواناں نوں ترقی دے کے پاکستان دی غربت گھٹ کراں گے۔اپنے اک پیغام وچ صدر مسلم لیگ ن شہباز شریف دا کہنا سی کہ نوجوان پاکستان دا مستقبل نیں، اونہاں دا مستقبل ہمیشہ صرف نواز شریف نے سنواریا اے، نواز شریف دی قیادت وچ پاکستان مسلم لیگ ن نے ہی نوجواناں نوں روزگار، تعلیم، ہنر تے امید دے تحفے دتے۔شہباز شریف نے آکھیا کہ سابقہ دور حکومت وچ مسلم لیگ ن دی حکومت نے نوجواناں لئی 20 ارب روپے دا 5 سالہ تریخی وزیراعظم یوتھ پروگرام شروع کیتا سی، پاکستان دی68 فیصد آبادی نوجواناں اتے مشتمل اے، نوجواناں دی ایس غالب آبادی نوں سنوارنا ، پڑھانا تے ہنرمند بنانا اے، ایہ صرف اسیں کر سکدے ہاں۔سابق وزیراعظم دا کہنا سی کہ دانش سکول جس طرح غریب تے محنتی طالب علماں دی زندگی بدل رہے نیں، ہن انہاں دا دائرہ پورے پاکستان تک پھیلاواں گے، ہر نوجوان نوں لیپ ٹاپ دیاں گے تاکہ ملک وچ انفارمیشن ٹیکنالوجی دا انقلاب لیان، 2024 توں 2029 تک زراعت، آئی ٹی، معدنیات، توانائی دے شعبیاں نوں خاص طور اتے ترقی دیاں گے۔صدر مسلم لیگ ن نے آکھیا کہ اگلے 5ورھیاں وچ معیشت نوں پیراں اتے کھڑا کراں گے، مہنگائی توں عوام نوں نجات دلواں گے، نوجواناں نوں ایس قابل بناواں گے کہ وہ اپنا کاروبار کرن، نوکریاں دین والے بنن، نوجواناں نوں ہنرمند بناواں گے،انہاںلئی باہردے ملک روزگار دا بندوبست کراں گے۔