دودھ دی قیمت گھٹن دے خلاف ڈیری فارماں دا عدالت نال رجوع

کراچی(پنجابی میڈیا گروپ)دودھ دی قیمت گھٹ کرن دے خلاف ڈیری فارمراں نے سندھ ہائیکورٹ نال رجوع کر لیا۔ڈیری فارماں ولوں دودھ دی قیمت 180 روپے فی کلو مقرر کرن دے اقدام نوں سندھ ہائی کورٹ وچ چیلنج کر دتا گیا۔ڈیری فارمراں دے وکیل منصف جان نے درخواست گزاراں ولوں آکھیا کہ کمشنر کراچی نے بغیر مشاورت دودھ 180 روپے فی کلو فروخت کرن دا نوٹیفکیشن جاری کیتا، ایہ نوٹیفکیشن غیرقنونی اے اوس نوں کالعدم قرار دتا جائے۔منصف جان نے درخواست وچ ہور آکھیا کہ کراچی دے چاراں ڈی سی تے سرکاری ڈپارٹمنٹ نے دودھ دی قیمت 196 توں 200 روپے فی کلو مقرر کیتی، کمشنر کراچی نے بغیر مشورے دے 180 دا نوٹیفکیشن جاری کیتا ساہنوں باڑھاں توں دودھ 200 دا مل رہیا اے، 180 دا کسطرح فروخت کرسکدے ہاں؟درخواست وچ آکھیا گیا اے کہ ساریاں ڈیری فارماں نے کمشنر نوں اک کلو دودھ داریٹ 229 روپے مقرر کرن دا آکھیا سی، کمشنر کراچی نے اپنی من مانی کر کے نوٹیفکیشن جاری کر دتا، گھٹ قیمت اتے دودھ دی کوالٹی وی متاثر ہوئے گی۔بعد وچ عدالت نے سندھ حکومت، کمشنر کراچی تے ہوراں نوں2 نومبر لئی نوٹس جاری کردیاں ہویاں ریکارڈ منگ لیا۔