لہور: دھرنا دین والے سرکاری ملازماں اُتے پلس دا دھاوا،91افرادگرفتار

لاہور( پنجابی میڈیا گروپ)پلس نے سول سیکرٹریٹ باہر دھرنا دین والے سرکاری ملازماں اُتے کریک ڈان کردیاں ہویاں91افراد گرفتار کر کے مختلف تھانیاں وچ منتقل کر دتے۔دھرنے دی انتظامیہ ساری رات غائب رہی جس اُتے پلس نے نجی ہوٹل دا ڈیٹا اکھٹا کرنا شروع کر دتا، اج ہور قیادت نوںوی گرفتار کرن بعد مختلف تھانیاں وچ مقدمے درج کیتے جان گے جدکہ پلس نے رَلتیاں دے موبائل فون ڈیٹا توں وی لوکیشن ٹریس کرنا شروع کردتی اے۔ پلس دا کہنا اے کہ جیہڑا ریڈار اُتے آئے گا اوس نوں گرفتارکیتا جائے گا، پلس نے دھرنے وچ رَلتی عورتاں اُتے وی ڈنڈے برسائے تے اونہاں نوں گرفتار کر لیا، استاداں سنے گریڈ1توں گریڈ 18 تک دے ملازم تا حال کس تھانے وچ نیں کوئی معلوم نہیں۔ذرائع دا کہنا اے کہ پلس نے اعلی پلس افسراں دے کہن اُتے رات گئے آپریشن شروع کیتا، لہور دے کئی تھانیاں دی پلس نے آپریشن وچ حصہ لیا، 3 ایس پی دھرنے دے رَلتیاں دے خلاف آپریشن دی صبح تک نگرانی کردے رہے۔