نگران حکومت دا تحریک انصاف دی قیادت نال رابطہ

اسلام آباد(پنجابی میڈیا گروپ) نگران حکومت نے پاکستان تحریک انصاف دی قیادت نال رابطہ کیتا۔سینئر مرکزی رہنما پاکستان تحریک انصاف شفقت محمود نال اونہاں دی رہائشگاہ اُتے نگران وزیرِاطلاعات مرتضی سولنگی نے ملاقات کیتی۔ملاقات وچ صاف شفاف الیکشن دے انعقاد، سیاسی جماعتاں لئی الیکشن وچ رَلت دے مساوی موقع دے اہتمام تے وسیع قومی مفاہمت سنے باہمی دلچسپی دے امور اُتے تفصیل نال گل بات کیتی گئی۔دوناں نے قومی سطح اُتے ہم آہنگی تے مفاہمت دے ودھا دے امکان، اہمیت تے لوڑ اُتے وی تبادل خیال کیتا۔سینئر مرکزی رہنما تحریک انصاف شفقت محمود نے آکھیا کہ شفاف الیکشن لئی ساریاں جماعتاں نوں الیکشن وچ حصہ لین دے یکساں محول تے مساوی موقع دی فراہمی نوں بنیادی حیثیت حاصل اے، تحریک انصاف نوں بلاشبہ برابری دی سطح اُتے سیاسی سرگرمیاں دے موقع نہیں مل رہے۔شفقت محمود نے آکھیا کہ تحریک انصاف نوں آئین و قنون دی روشنی وچ انتخابی مہم چلان دی وی اجازت نہیں جدکہ ہوراں جماعتاں نوں ملک بھر وچ جلسے جلوساں دی کھلی آزادی اے، نہایت ناہموار محول وچ منعقد کروائے گئے خلافِ قاعدہ الیکشن عوامی سطح اُتے ساکھ تے قبولیت توں محروم رہن گے،ایس دے علاوہ صدر مملکت عارف علوی نال تحریک انصاف دے سیکرٹری اطلاعات رئوف حسن تے بیرسٹر عمیر نیازی نے وی ملاقات کیتی جس وچ موجودہ سیاسی صورتحال اُتے تبادلہ خیال کیتا گیا۔