مصر امن اجلاس:عرب ملکاں نے فلسطینیاں دی جبری بے دخلی نوں مسترد کردتا

قاہرہ( پنجابی میڈیا گروپ)مصر دی سربراہی وچ منعقدہ قاہرہ امن اجلاس وچ سعودی عرب سنے عرب ملکاں نے غزہ وچ اسرائیلی بربریت دی مذمت کردیاں ہویاں اسرائیل دی غزہ دے لوکاں نوں جبری بے دخل کرن دیاں کوششاں نوں مسترد کر دتا۔اجلاس دے موقع اُتے فلسطینی صدر محمود عباس نے اپنی سرزمین کَدی نہ چھڈن دے عزم دااظہار کردیاں ہویاں آکھیا کہ اسیں اپنی سرزمین کَدی نہیں چھڈاں گے تے نہ ہی کوئی ساہنوں اپنے سرزمین توں بے دخل کرسکدا اے۔اجلاس نال اپنے خطاب وچ سعودی عرب دے وزیر خارجہ شہزادہ فیصل بن فرحان نے اکھیا کہ فلسطین وچ ہون والے المناک واقعات جنگ بندی لئی فوری اقداماں دے متقاضی نیں، فلسطینیاں نوں اونہاں دی سرزمین توں بے گھر کرن دی کسی وی کوشش نوں مسترد کردے ہاں۔ شہزادہ فیصل بن فرحان نے غزہ لئی محفوظ انسانی راہداریاں نوں فوری طور اُتے کھولن دا مطالبہ کر دیاں ہویاں عالمی برادری توں مطالبہ کیتا کہ اوہ اسرائیل نوں بین الاقوامی قنون دی پاسداری کرن دا پابند بنائے۔اردن دے شاہ عبداللہ نے فلسطینیاں دی جبری نقل مکانی نوں جنگی جرم قرار دیندیاں ہویاں آکھیا کہ عرب دنیا نوں ایس ویلے جیہڑا پیغام سنایا جارہیا اے اوہ ایہ اے کہ فلسطینیاں دیاں زندگیاں اسرائیلیاں دے مقابلے وچ کوئی اہمیت نہیں رکھدیاں۔اجلاس دے میزبان مصر دے صدر عبدالفتاح السیسی نے اپنے خطاب وچ آکھیا کہ امید اے کہ رَلتی دہائیاں پرانے مسئلہ فلسطین دے مستقل حل تے قیام امن لئی اقدام کرن گے ،اسیں غزہ دے شہریاں نوں صحرائے سیناوَل دکھیلن نوں مسترد کردے ہاں، مسئلہ فلسطین دا واحد حل آزاد فلسطینی ریاست دا قیام اے۔عرب ملکاں دے علاوہ فرانس، برطانیہ تے جرمنی دے وزرائے خارجہ نے وی قاہرہ امن کانفرنس وچ رَلت کیتی تے غزہ اُتے بمباری نال پیدا ہون والی صورت حال اُتے گل بات کیتی گئی۔