نوازشریف احتساب عدالت وچ پیش، توشہ خانہ ریفرنس وچ ضمانت منظور

اسلام آباد( پنجابی میڈیا گروپ)سابق وزیراعظم نواز شریف احتساب عدالت وچ پیش ہو گئے، جیتھے اونہاں دی توشہ خانہ کیس وچ ضمانت منظور کر لئی گئی۔مسلم لیگ ن دے قائد تے سابق وزیراعظم نواز شریف دی عدالت آن اُتے پارٹی صدر شہباز شریف، لیگی رہنما اعظم نذیر تارڑ، مریم نواز، مریم اورنگزیب، خواجہ سعد رفیق تے ہوراں دے نال کارکناں دی وڈھی تعداد موجود سی ۔ نواز شریف دی آمد اُتے کارکناں دی وڈھی تعداد تے لوکاں دے رَش پاروں کمرہ عدالت دا دروازہ بند کردتا گیا ۔ نواز شریف نے نشست اُتے کھڑے ہو کے اپنی حاضری لگوائی۔ ایس موقع اُتے عدالت باہر سکیورٹی دے سخت انتظام کیتے گئے سن۔ پلس تے قنون نافذ کرن والے اداریاں دے اہل کاراں دی بھاری نفری تعینات کیتی گئی سی۔حاضری بعد عدالت نے نواز شریف نوں جان دی اجازت دے دتی، جس دے بعد سابق وزیراعظم اسلام آباد ہائی کورٹ روانہ ہو گئے۔