سپریم کورٹ نے نگران حکومت دی لوڑاُتے سوال چُک دِتے

اسلام آباد( پنجابی میڈیا گروپ)سپریم کورٹ نے نگران حکومت دی لوڑ اُتے سوال چُک دتے۔اک ہی دن الیکشن کران لئی درخواست دی سماعت وچ چیف جسٹس قاضی فائز عیسی نے ریمارکس دتے کہ نگران حکومت دا اک مقصد شفاف الیکشن یقینی بنانا ہُندا اے۔لیکن آئین نے شفاف الیکشن دی ذمہ داری اک ہور ادارے نوں دتی اے،جَد ایہ ذمہ داری الیکشن کمیشن دی اے تے نگران حکومت دی لوڑ کیہ اے،جس آمر نے نگران حکومت دی شق آئین وچ شامل کیتی اوس نے خود اوس اُتے عمل نہیں کیتا،ضیا الحق نے آر سی او ذریعے نگران حکومت دی شق پائی،لیکن جَد محمد خان جونیجو دی حکومت ختم کیتی گئی تے نگران حکومت نہیں بنائی گئی ،ملک وچ2الیکشن نگران حکومت بغیر ہوئے،پارلیمنٹ نے اوس نوں ویکھنا اے۔پی پی وکیل فاروق ایچ نائیک نے آکھیاکہ نگران حکومتاں دا تصور آئین پاکستان دے دیباچہ توں متصادم اے، آئین پاکستان دا دیباچہ کہندا اے کہ حاکمیت اللہ دی ہوئے گی۔