سائفر کیس:عمران خان نے فرد جرم دی کارروائی چیلنج کردتی

اسلام آباد( پنجابی میڈیا گروپ)چیئرمین پی ٹی آئی عمران خان نے سائفر کیس وچ فرد جرم دی کارروائی اسلام آباد ہائی کورٹ وچ چیلنج کردتی۔پنجابی میڈیا دے مطابق چیئرمین پی ٹی آئی عمران خان نے سائفر لیک کیس وچ وکیل سلمان صفدر تے خالد یوسف ذریعے اک درخواست دائر کیتی اے جس وچ فرد جرم عائد کرن دی کارروائی نوں کالعدم قرار دین دی استدعا کیتی گئی اے۔درخواست وچ مدعی مقدمہ یوسف نسیم کھوکھر تے ریاست نوں فریق بنایا گیا جس وچ آکھیا گیا اے کہ قنون مطابق مقدمے دی نقل تقسیم کرن دے 7 دن بعد چارج فریم کیتا جا سکدا اے لیکن ٹرائل کورٹ نے 7دن دے قنونی تقاضے نوں وی مدنظر نہیں رکھیا، ٹرائل کورٹ نے چھیتی وچ فرد جرم عائد کیتی تے ٹرائل وی چھیتی مکمل کرنا چاہندی اے، اعلی عدلیہ ولوں ٹرائل روزانہ دی بنیاد اُتے سماعت یا چھیتی مکمل کرن دی کوئی ہدایت نہیں۔درخواست وچ آکھیا گیا اے کہ چھیتی وچ ٹرائل اگے ودھان نال بنیادی آئینی حقوق متاثر ہون گے، مرکزی ثبوت سائفر ٹیلی گراف دی عدم موجودگی وچ ٹرائل اگے نہیں ودھایا جا سکدا، آفیشل سیکرٹ ایکٹ عدالت دا23اکتوبرداآرڈر کالعدم قرار دتا جائے۔