غزہ اُتے اسرائیلی بمباری جاری،24گھنٹیاں وچ704فلسطینی شہید،تعداد5800ہوگئی

غزہ ( پنجابی میڈیا گروپ)غزہ لہو لہو اے، صیہونی فورسز دے وحشیانہ حملے جاری نیں،پچھلے24گھنٹیاں دوران غزہ تے گردونواح وچ324حملیاں وچ 704معصوم فلسطینیاں نوں شہید کردتا گیا جس دے بعد شہید ہون والے فلسطینیاں دی تعداد5 ہزار800 ہوگئی اے ۔غزہ وچ صورتحال دن بدن ابتر ہون لگی، صیہونی فورسز غزہ دا نام و نشان مٹان دے درپے نیں، اسرائیلی فوج نہتے تے مظلوم فلسطینیاں اُتے ظلم و ستم ڈھانے وچ مصروف اے، صیہونی جارحیت دا نشانہ بنن والیاں وچ2300بال وی شامل نیں جدکہ زخمیاں دی تعداد 18ہزارتک پہنچ گئی اے ۔ اسرائیلی فضائیہ ولںسیغزہ دے الشاتی کیمپ اُتے رات گئے بمباری کیتی گئی جس وچ182بال تے درجناںعورتاں سَنے436 فلسطینی شہید ہوگئے جدکہ سینکڑاں زخمی ہوئے نیں۔غزہ وچ قیامت خیز منظر ویکھن وچ آرہے نیں، خوراک ، پانی سنے بنیادی شیواں دی قلت اے، غزہ دے35وچوں12 ہسپتالاں نے کم بند کردتا اے،72وچوں46طبی مراکز غیر فعال ہوچکے نیں، مسلسل حملیاں وچ ڈاکٹراں سنے طبی عملے دے65ارکان شہید ہوئے نیں۔صیہونی فورسز نے خان یونس وچ فضائی حملے وچ 3خانداناں دے23افراد شہید کر دتے جدکہ الفلوجہ وچ وی حملے اندر 17 افراد شہید ہوگئے۔