غیر قنونی وَسن والیاں لئی پلان تیار، رعایت نہیں وَرتی جائے گی، سرفراز بگٹی

اسلام آباد(پنجابی میڈیا گروپ)نگران وفاقی وزیر داخلہ سرفراز بگٹی ہوراں آکھیا اے کہ غیرقنونی افراد دی نشاندہی ہوچکی اے ، غیرقنونی وَسن والیاں لئی پلان تیار کر لیا گیا اے۔اسلام آباد وچ پریس کانفرنس کردیاں ہویاں سرفراز بگٹی دا کہنا سی کہ غیرقنونی وَسن والیاں لئی عارضی کیمپ قائم کر دتے گئے نیں، صوبائی حکومتاں غیر ملکی افراد دے انخلا دے اخراجات برداشت کررہیاں نیں، سینٹراں وچ میڈیکل سہولتاں تے کھانا پینا فراہم کیتا جائے گا۔اونہاں نے آکھیا کہ اسیں ہولڈنگ سینٹر بنا دتے نیں، غیر قنونی وَسن والیاں نوں اوتھوں ہی واپس گھلیا جائے گا، بالاں، عورتاں تے بزرگاں نوں انتہائی احترام نال رکھیا جائے گا، یکم نومبربعد غیر قنونی وَسن والیاں دے معاملے اُتے کوئی سمجھوتہ نہیں کراں گے۔