سینئر صوبائی وزیر عبدالعلیم خان نے کنک تے آٹے دی سبسڈی وچ تبدیلی لیان دا اشارہ دے دتا
لہور : صوبہ پنجاب دے سینئر وزیر عبدالعلیم خان نے کنک تے آٹے دی سبسڈی وچ تبدیلی لیان دا اشارہ دیندیاں آکھیا اے فلور ملز تے اداریاں دی بجائے ایہدا فائدہ بلاواسطہ عام بندے نوں ہونا چاہیدا اے۔
عبدالعلیم ولوں جاری بیان وچ آکھیا گیا مستحق تے گھٹ آمدنی والیاں لئی آٹے تے وکھری تے ودھ سبسڈی ہونی چاہیدی اے۔ فائیو سٹار ہوٹل تے ڈھابے تے اک ای قیمت دے آٹے دی فراہمی زیادتی اے۔
سینئر صوبائی وزیر آکھیا امیر تے غریب بندہ اک ای ریٹ تے روٹی لے رہیا اے۔ آٹے دی سبسڈی لئی ”کوپن سسٹم“ دی تجویز زیر غور اے۔
اوہناں آکھیا پنجاب وچ آٹے تے ٹارگٹڈ سبسڈی لئی مربوط پالیسی لیاواں گے تے غریب بندے تک ودھ توں ودھ سہولت اپڑان لئی اقدامات کراں گے۔
اوہناں دا کہنا سی سبسڈی دی فراہمی لئی احساس پروگرام دے ڈیٹا بیس توں مدد لئی جا سکدی اے جد کہ عام بندے دی سہولت لئی یوٹیلیٹی سٹوراں دا نیٹ ورک وی استعمال وچ لیاواں گے۔
