چیف جسٹس فائز عیسی دے ہُندیاں انصاف نہیں مل سکدا پی ٹی آئی

راولپنڈی(پنجابی میڈیاگروپ)پاکستان تحریک انصاف(پی ٹی آئی) دے سینیئر نائب صدر شیر افضل مروت نے آکھیا اے کہ پی ٹی آئی سمجھدی اے موجودہ چیف جسٹس قاضی فائز عیسی دے ہُندیاں ہویاں ساہنوں انصاف نہیں مل سکدا۔اڈیالہ جیل دے باہر میڈیا نال گل بات وچ پی ٹی آئی رہنما شیر افضل مروت نے آکھیا کہ پی ٹی آئی چیف جسٹس دے رویے دی مذمت کردی اے، تہانوں کوئی حق نہیں تُسی پی ٹی آئی یا اونہاں دے وکیلاں دی تضحیک کرو۔اسیں چیف جسٹس قاضی فائز عیسی اُتے عدم اعتماد دا اعلان کر رہے ہاں۔اونہاں نے آکھیا کہ اج لیگل ٹیم نے بانی پی ٹی آئی نال ملاقات کرکے سپریم کورٹ وچ زیر سماعت کیساں اُتے گل بات کیتی لیکن فاضل چیف جسٹس دا تحریک انصاف دے وکیلاں دے نال رویہ توہین آمیز اے۔ فاضل چیف جسٹس سمجھدے نیں ملک وچ امن و آشتی اے۔شیر افضل مروت نے آکھیا کہ پی ٹی آئی دے12سو کاغذات نامزدگی مسترد ہوئے نیں لیکن ساڈھے کیساں نوں نظر انداز کیتا جا رہیا اے۔ سپریم کورٹ نے عمیر نیازی نوں توہین عدالت دا نوٹس گھلیا لیکن آر اوز دے کنڈکٹ اُتے نوٹس نہیں لیا جا رہیا، ساڈھے تجویز کنندہ تے تائید کنندہ نوں اغوا کیتا جا رہیا اے، بہتر ہوئے گا پی ٹی آئی دے کیساں لئی وَکھ بینچز بنائے جان۔پی ٹی آئی رہنما نے آکھیا کہ چیف جسٹس پی ٹی آئی دور وچ دائر کیتے گئے ریفرنس دا بغض نہیں کڈ سکے تے اسیں قاضی فائز عیسی دے چیف جسٹس بنن اُتے مبارک باد دتی وی،اسیں تحمل دا مظاہرہ کیتا اے لیکن پی ٹی آئی توہین برداشت نہیں کرسکدی۔سینیئر نائب صدر پی ٹی آئی دا کہنا سی کہ سپریم کورٹ توں اج تک ساہنوں کوئی ریلیف نہیں ملا بلکہ سائفر کیس وچ عمران خان تے شاہ محمود قریشی نوں ضمانت کسی ہور بینچ توں ملی اے۔ بانی پی ٹی آئی دی ضمانت ساڈھے اُتے احسان نہیں ساڈھا حق اے۔