الیکشن لیٹ کرن یا نہ کرن دا آئینی اختیار صرف الیکشن کمیشن دے کول اے، مرتضی سولنگی

اسلام آباد(پنجابی میڈیاگروپ)نگران وفاقی وزیر اطلاعات، نشریات و پارلیمانی امور مرتضی سولنگی نے آکھیا اے کہ ایوان بالا وچ الیکشن لیٹ کرن دی قرارداد وچ دلائل دین دا موقع نہیں ملیا، الیکشن لیٹ کرن یانہ کرن داآئینی اختیار صرف الیکشن کمیشن آف پاکستان دے کول اے۔پارلیمنٹ ہائوس دے باہر میڈیا نال گل بات کردیاں ہویاں مرتضی سولنگی دا کہنا سی کہ وزیراعظم یا کابینہ ولوں الیکشن لیٹ بارے کوئی حکم موجود نہیں سی، آئین دے آرٹیکل 218(3) تحت الیکشن کرانا، الیکشن دی تریخ دینا یا تبدیل کرنا الیکشن کمیشن دا اختیار اے۔مرتضی سولنگی نے آکھیا کہ اسیں کسی آئینی ادارے دے معاملیاں وچ مداخلت نہیں کر سکدے، قرارداد اندر جیہڑے مسائل بیان کیتے گئے نیں کہ اوہ حقیقی مسائل نیں، پاکستان دی پارلیمانی سیاست تے الیکشن دی تریخ وچ ایہ مسائل پہلاں وی موجود رہے نیں۔نگران وفاقی وزیر اطلاعات نے آکھیا کہ سکیورٹی دی فراہمی سنے موسم تے ہور مسائل دا خیال رکھنا حکومت دی ذمہ داری اے، اجے تک کسی حلقے ولوں کوئی ایسا اشارہ نہیں ملیا جس وچ واضح پیغام ہوئے کہ الیکشن نہیں ہونے چاہیدے۔