وزیراعلیٰ پنجاب دی پٹرولیم مصنوعات دی قیمتاں وچ کمی دا فائدہ عوام تک اپڑان دی ہدایت

لہور: وزیراعلیٰ پنجاب نے پٹرولیم مصنوعات دی قیمتاں وچ حالیہ ہور کمی دا فائدہ عام بندے تک اپڑان دی ہدایت کر دتی۔

اوہناں آکھیا متعلقہ ادارے تے محکمے موثر منصوبہ بندی کرکے ریلیف دے اقدامات نوں یقینی بنان۔

وزیراعلیٰ پنجاب عثمان بزدار ولوں جاری ہدایات وچ آکھیا گیا اے پٹرولیم مصنوعات دی قیمتاں وچ حالیہ کمی دے ثمرات ہر حال وچ عوام تک اپڑنے چاہیدے نیں، پٹرولیم مصنوعات دی قیمتاں وچ کمی دے تناسب نال اشیائے ضروریہ دی قیمتاں وچ کمی لیان لئی اقدامات کیتے جان۔

عثمان بزدار آکھیا تحریک انصاف دی سرکار دا ہر قدم عوام نوں ریلیف دی فراہمی لئی اٹھ رہیا اے۔

پٹرولیم مصنوعات دی قیمتاں وچ نمایاں کمی پاکستان تحریک انصاف دی سرکار دا عوام لئی تحفہ اے، سرکار نے پٹرولیم مصنوعات دی قیمتاں وچ نمایاں کمی کرکے عوام دے دل جت لئے نیں، وزیراعظم عمران خان دی قیادت وچ عوام نوں ریلیف دین لئی ہور اقدامات جاری رکھاں گے۔