بھارتی فورسز دے ہتھوں کشمیریاں دا ماورائے عدالت قتل، پاکستان دی شدید مذمت

اسلام آباد: پاکستان نے قابض بھارتی فورسز دے ہتھوں مقبوضہ کشمیر وچ اک دیہاڑے 13کشمیریاں دے ماورائے عدالت قتل دی سخت لفظاں وچ مذمت کیتی اے۔

ترجمان دفتر خارجہ عائشہ فاروقی ولوں جاری بیان وچ آکھیا گیا اے نام نہاد انسداد در اندازی آپریشن دے ناں تے کشمیریاں دا جعلی مقابلیاں وچ قتل کیتا جا رہیا اے۔ قابض بھارتی فورسز نے اک دن وچ 13معصوم کشمیریاں نوں قتل کیتا۔

بیان وچ بھارتی مظالم تے آواز چکدیاں آکھیا گیا اے عالمی برادری کورونا وائرس نال نبرد آزما اے تے دوجے پاسے بھارت مقبوضہ کشمیر وچ مظالم ودھا رہیا اے۔ ترجمان نے آکھیا اک دن وچ 13کشمیریاں دا قتل بھارت دے انسانیت سوز مظالم تے جرائم دا مظہر اے۔

بھارتی حکام اپنے جرائم لُکان لئی کشمیری مزاحمت کاراں دی تربیت تے دراندازی دے الزام لا رہے نیں۔ اوہناں دا کہنا سی بھارت دی انتہا پسند ہندو تنظیم آر ایس ایس تے حکمران جماعت بھارتیا جنتا پارٹی (بی جے پی) اپنے اقدامات دی وجہ توں دنیا دے ساہمنے بے نقاب ہو چکی۔دفتر خارجہ ولوں تنبیہ کردیاں آکھیا گیا اے بھارت جان لوے کہ ایہدے مظالم کشمیری عوام دے عزم نوں کمزور نہیں کر سکدے۔

پاکستان مخالف پروپیگنڈا بھارتی ریاستی دہشت گردی توں عالمی توجہ نہیں ہٹا سکدا۔