مریم نواز دا سنٹرل جیل کوٹ لکھپت دورہ، قیدی عورتاں دے نال روزہ افطارکیتا

لہور(پنجابی میڈیا)وزیراعلی پنجاب مریم نوازشریف نے سنٹرل جیل کوٹ لکھت دا دورہ کیتا تے قیدی عورتاں دے نال روزہ افطار کیتا۔وزیر اعلی مریم نواز پروہنیاں دے نال بیٹھن دی بجائے قیدی عورتاںدے نال بیٹھ گئیاں، وزیراعلی قیدی عورتاں نوں خود سموسے ، پکوڑے ،پھل تے کھانا پیش کر دیاں رہیاں، مریم نواز نے سنٹرل جیل دے صحن وچ پودا لایا تے ہور درخت لان دی ہدایت وی کیتی۔مریم نواز نے اوس سیل دا دورہ وی کیتا جیتھے اونہاں دے والد نواز شریف قید رہے، مریم نواز جیل وچ گزارے ویلے دیاں یاداں تازہ کر دیاں ہویاں جذباتی ہوگئیاں۔اونہاں نے جیل دے کچن دا دورہ کیتا ، قیدیاں لئی تیار کھانے دا جائزہ لیا تے معیار چیک کیتا، وزیراعلی پنجاب دی ہدایت اُتے قیدیاں لئی سپیشل افطار مینیو تیار کیتا گیا، وزیراعلی نے قیدیاں نال گل بات کیتی،مسائل تے ضرورتاں بارے پچھیا ۔مریم نواز نے قیدی عورتاں دے نال موجود ننھی بالڑی دا ہتھ پھڑ لیا تے اوس نوں کھان بارے پچھیا، وزیراعلی نے جیل وچ اپنی قید دے دوران ڈیوٹی اُتے متعین جیل سٹاف نال ملاقات وی کیتی۔