مریم دے خلاف پلس وردی پان اُتے درج مقدمے دی درخواست اُتے سماعت نہ ہو سکی

لہور(پنجابی میڈیا)سیشن کورٹ لہور وچ فاضل جج دے تبادلے پاروں مریم نواز خلاف پلس دی وردی پان دے خلاف مقدمہ درج کرن دی درخواست اُتے اج وی سماعت نہ ہو سکی۔لہور دی عدالت وچ پلس دی یونیفارم پان اُتے وزیراعلی پنجاب مریم نواز دے خلاف درج مقدمے دی درخواست اُتے سماعت 2 مئی تک ملتوی کردتی گئی واضح رہے کہ عدالت نے درخواست گزار توں فرنٹ ڈیسک دی رپورٹ منگ رکھی اے۔وزیراعلی پنجاب مریم نوازدے خلاف درخواست وقار علی نامی شہری نے دائر کر رکھی اے۔اج دوران سماعت وکیل آفتاب باجوہ نے عدالت نوں دسیا کہ وزیراعلی پنجاب مریم نواز نے پلس آفیشل دی وردی پائی، کوئی شخص کسی ادارے دی وردی نہیں پا سکدا، اونہاں نے عدالت توں مریم نواز دے خلاف مقدمہ درج کرن دا حکم دین دی استدعا کیتی۔