پاکستان نوں کمزور طبقے نوں ریلیف دیندیاں ہویاں مالی ہدف اُتے عمل کرنا پئے گا،آئی ایم ایف

واشنگٹن(نیوزڈیسک)آئی ایم ایف دے ایگزیکٹو بورڈ نے پاکستان لئی اسٹینڈ بائی ارینجمنٹ(ایس بی اے) تحت دُوجا جائزہ دی منظوری دیندیاں ہویاں فوری طور 1.1ارب ڈالر پاکستان نوں جاری کرن دی منظوری دتی۔آئی ایم ایف نے اعلامیے وچ آکھیا کہ ایس منظوری بعد پاکستان دے نال اسٹینڈ بائی ارینجمنٹ پروگرام تحت 3ارب ڈالر دی مجموعی ادائیگی مکمل ہو جائے گی۔ اسٹینڈ بائی ارینجمنٹ پروگرام مکمل ہوگیا اے، جس تحت دُوجے تے آخری جائزے دی تکمیل پاکستانی حکام دی مضبوط پالیسی دی کوششاں دی عکاسی کر دی اے، جس نے معیشت دے استحکام تے معمولی ترقی دی واپسی وچ مدد کیتی اے۔اعلامیے وچ آکھیا گیا کہ پاکستان نوں استحکام نال مضبوط تے پائیدار بحالی ول لے جان لئی حکام نوں اپنی پالیسی تے اصلاح دی کوششاں جاری رکھن دی لوڑ اے۔