سماں بلاک کرن توں نہیں نجی کمپنی خلاف کارروائی توں روکیا،اسلام آباد ہائیکورٹ

اسلام آباد(بیورورپورٹ)چیف جسٹس اسلام آباد ہائی کورٹ جسٹس عامر فاروق نے آکھیا اے کہ اسیں سماں بند کرن توں نہیں نجی کمپنی خلاف کارروائی توں روکیا سی۔اسلام آباد ہائی کورٹ وچ سماں بلاک کرن بارے نجی کمپنی خلاف کارروائی توں روکن دے حکم امتناع دے خلاف درخواست اُتے سماعت ہوئی۔چیف جسٹس اسلام آباد ہائی کورٹ نے سماعت دے شروع اُتے ریمارکس د تے کہ جی اٹارنی جنرل صاحب!تُسی اج اسلام آباد ہائی کورٹ وچ کسطرح؟ اٹارنی جنرل نے جواب دتا کہ موبائل سماں والا آرڈر سی اوس دا حکم امتناع خارج کروانا سی، جسٹس عامر فاروق نے آکھیا کہ میڈیا توں درخواست اے کہ پچھلی وار دا آرڈر جیہڑا رپورٹ ہویا سی اوہ ا ینج نہیں سی۔اٹارنی جنرل نے آکھیا کہ سیکشن 144 مکمل جواب فراہم کردا اے جیہڑا ٹیکس بارے اے، جس دی آمدنی گھٹ ہوئے گی ظاہر اے اوہ اپلائی وی نہیں کرے گا، این ٹی این نمبربارے وی چیزاں واضح نیں۔چیف جسٹس اسلام آباد ہائی کورٹ عامر فاروق نے ریمارکس د تے کہ مرکزی کیس 27 مئی نوں مقرر اے، اٹارنی جنرل نے جواب دتا کہ فیر27 مئی توں پہلاں دی کوئی اگلے ہفتے دی تریخ دے دین۔بعد وچ عدالت نے سماں بلاک کرنے بارے نجی کمپنی خلاف کارروائی توں روکنے دے حکم امتناع خلاف درخواست اُتے نوٹس جاری کر دیاں ہویاں 22 مئی تک جواب منگ لیا۔