ایرانی صدر تے وزیر خارجہ سنے8افراد ہیلی کاپٹر حادثے وچ جاں بحق

تہران(نیوزڈیسک) ایران دے صدر ابراہیم رئیسی، اونہاں دے چیف گارڈ، وزیر خارجہ، صوبے مشرقی آذربائیجان دے گورنر، آیت اللہ خامنہ ای دے نمائندہ خصوصی، تے ہیلی کاپٹر عملے دے 3 ارکان حادثے وچ جاں بحق ہوگئے۔ایرانی وزیر داخلہ نے پچھلی رات لاپتا ہون والے ہیلی کاپٹر داملبہ تبریز توں 100 کلومیٹر دور اک گھنے جنگل وچ ملن دی تصدیق کر دیاں ہویاں دسیا کہ ساریاں لاشاں بری طرح سڑگئیاں۔حکام دا کہنا اے کہ کجھ لاشاں سڑ کے ناقابل شناخت ہوگئیاں۔ حادثے وچ جاں بحق ہون والے ہیلی کاپٹر عملے دے 3 ارکاناں دی شناخت پائلٹ کرنل سید طاہر مصطفوی، پائلٹ کرنل محسن دریانوش تے فلائٹ ٹیکنیشن میجر بہروزش دے ناں توں ہوئی ایس دے علاوہ ہیلی کاپٹر وچ صدر ابراہیم رئیسی دے محافظاں دی ٹیم دے چیف گارڈ سردار سید مہدی یوسفی وی موجود سن ۔ہیلی کاپٹر وچ صدر ابراہیم رئیسی، وزیر خارجہ حسین امیر عبداللہیان دے نال صوبے مشرقی آذر بائیجان دے گورنر مالک رحمتی تے ایرانی سپریم لیڈر آیت اللہ خامنہ ای دے ترجمان محمد علی آل ہاشم وی سوار سن۔ایرانی میڈیا مطابق ہیلی کاپٹر وچ سوار سارے افراد جاں بحق ہوگئے۔سپریم لیڈر آیت اللہ خامنہ ای نے حادثے اُتے دلی رنج دا اظہار کر دیاں ہویاں ملک بھر وچ 5 روزہ قومی یوم سوگ دا اعلان کیتا تے نائب صدر محمد مخبر نوں2 مہینیاں لئی عبوری صدر مقرر کردتا۔