آزادی مارچ کیس: عمران خان تے ہور کئی پی ٹی آئی رہنما بری

اسلام آباد(بیورورپورٹ)ڈسٹرکٹ اینڈ سیشنز کورٹ اسلام آباد نے آزادی مارچ اُتے تھانہ کراچی کمپنی وچ درج مقدمیاں وچ سابق وزیراعظم و بانی پاکستان تحریک انصاف (پی ٹی آئی)عمران خان تے ہور پی ٹی آئی رہنماواںنوں بری کر دتا۔عمران خان، فیصل جاوید، علی نواز اعوان، سیف اللہ نیازی، زرتاج گل تے اسد عمر دی بریت دی درخواستاں اُتے جوڈیشل مجسٹریٹ مرید عباس خان نے محفوظ شدہ فیصلہ سنایا۔وکیل نعیم پنجوتھہ، سردار مصروف تے آمنہ علی عدالت وچ پیش ہوئے تے بریت دی درخواستاں اُتے دلائل دتے۔ایس موقع اُتے اسد عمر، سیف اللہ نیازی عدالت وچ پیش ہوئے جدکہ فیصل جاوید، زرتاج گل دی حاضری توں استثنی دی درخواست دائر کیتی گئی۔وکیل نعیم پنجوتھہ دا کہنا سی کہ عمران خان اُتے سیکشن 109 دا الزام اے کہ اونہاں دی ایما اُتے ہنگامہ ہویا، مقدمہ درج کرن دی اتھارٹی صرف اوس دے کول اے جس نے دفعہ 144 نافذ کیتی۔وکیل نعیم پنجوتھہ نے دلائل د تے کہ غیر مجاز شخص ولوں ایف آئی آر درج کروائی گئی، جس ایف آئی آر دی بنیاد ہی غلط ہوئے اوہ مقدمہ اگے کسطرح چل سکدا اے؟اونہاں دا ہور کہنا سی کہ کوئی ویڈیو شواہد وی عمران خان دی حد تک پیش نہیں کیتے جاسکے، پرامن احتجاج اُتے وی ایف آئی آراں درج کیتیاں گئیاں۔بعد وچ محفوظ فیصلہ سنا ندیاں ہویاں ڈسٹرکٹ اینڈ سیشن کورٹس اسلام آباد نے احتجاج تے توڑ پھوڑ اُتے تھانہ کوہسار وچ درج مقدمہ وچ وی عمران خان سنے ہوراںنوں بری کر دتا۔واضح رہے کہ 15 مئی نوں ڈسٹرکٹ اینڈ سیشن کورٹس اسلام آباد نے آزادی مارچ دے دوران تھانہ کھنہ وچ درج مقدمہ وچ پاکستان تحریک انصاف دے بانی چیئرمین عمران خان نوں بری کر دتا سی۔