عدت کیس؛ عمران خان، بشری بی بی دی سزاواں خلاف اپیلاں اُتے فیصلہ محفوظ

اسلام آباد(بیورورپورٹ) ڈسٹرکٹ اینڈ سیشن کورٹس اسلام آباد نے عدت کیس وچ عمران خان تے بشری بی بی دی سزاواں خلاف اپیلاں اُتے فیصلہ محفوظ کرلیا۔ڈسٹرکٹ اینڈ سیشن جج شاہ رخ ارجمند نے دورانِ عدت نکاح کیس وچ بانی پی ٹی آئی تے بشری بی بی دی سزاواں خلاف اپیلاں دی سماعت کیتی۔بشری بی بی دے وکیل عثمان ریاض گل نے دلائل د تے کہ ایہ کیس صرف و صرف سیاسی طور اُتے نشانہ بنان لئی دائر ہویا اے، خاورمانیکا دی شکایت تے تقریبا 6 ورھیاں بعد دائر ہوئی، عزائم وچ بدنیتی واضح اے، ویاہ فراڈ اے یا نہیں ؟ کریمینل کورٹ دے کول فیصلہ کرن دا اختیار نہیں، فراڈ ویاہ یا نکاح بارے فیملی کورٹ فیصلہ کر دی اے، بشری بی بی نے اپنے 342 دے بیان وچ دسیا کہ طلاق اپریل 2017 وچ ہوئی تے اونہاں نے عدت دا دورانیہ مکمل کرکے نکاح کیتا ، پراسیکیوٹر رانا حسن عباس نے عدالت نوں حقائق دسے، جس اُتے پراسیکیوٹر راناحسن عباس نوں اگلے ہی دن ٹرانسفر کردتاگیا۔جج شاہ رخ ارجمند نے ریمارکس د تے کہ تُسی اوس دے بعد کیہ توقع کرسکدے او؟ جج دے جملے اُتے عدالت وچ ہاسے چِھڑ گئے۔ڈپٹی ڈسٹرکٹ پراسکیوٹر عدنان علی نے سزا نوں برقرار رکھن دی استدعا کر دیاں ہو یاں دلائل دتے کہ قنون وچ کِدھرے نہیں لکھیا کہ ایس طرح دے کیساں دا ٹرائل کرمنل وچ نہیں ہوسکدا ، مدعی نے بانی پی ٹی آئی تے بشری بی بی دے نکاح نوں ختم کرن دا مطالبہ نہیں کیتا، بلکہ دوران عدت نکاح کرن اُتے سزا اے۔پراسکیوٹر نے ہورآکھیا کہ بانی پی ٹی آئی بار بار خاورمانیکا، بشری بی بی دی زندگی وچ مداخلت کررہے سن، اونہاںدی مداخلت پاروں ہسداوَسدا گھر اُجڑ گیا، ریاست مدینہ بنان والے شخص دا ایسا عمل طرزعمل اے؟۔عدالت نے عدت دوران نکاح کیس وچ بانی پی ٹی آئی تے بشری بی بی دی سزاواں خلاف اپیلاں اُتے فیصلہ محفوظ کرلیا جیہڑا29 مئی نوں سنایا جائے گا۔