اج ثاقب نثار دا فیصلہ ردی دی ٹوکری وچ سُٹ دتا گیا،نوازشریف

لہور( پنجابی میڈیا)مسلم لیگ (ن) دے قائد تے نومنتخب صدر نواز شریف نے آکھیا اے کہ اج ثاقب نثار دا فیصلہ ردی دی ٹوکری وچ سُٹ دتا گیا، بلائواونہاں لوکاں نوں جنہاں نے فیصلہ دتا سی کہ نواز شریف نوں ہمیشہ لئی فارغ کیتا جاندا اے۔پارٹی دے جنرل کونسل اجلاس نال خطاب کر دیاں ہویاں اونہاں نے آکھیا کہ ثاقب نثار نے مینوں زندگی بھر لئی پارٹی دی صدارت توں ہٹایا،اج لوکاں نے ثاقب نثار دا فیصلہ ردی دی ٹوکری وچ سُٹ دتا، بلائواونہاں لو کاں نوں جنہاں نے فیصلہ دتا سی کہ نواز شریف نوں ہمیشہ لئی فارغ کیتا جاندا اے مگر اج نواز شریف اک وار فیر تہاڈے سامنے کھڑا اے۔اونہاں نے آکھیا کہ میرے خلاف فیصلہ وی کیتا سی؟ بیٹے توں تنخواہ نہ لین دا؟ میں اپنے بیٹے توں تنخواہ نہیں لئی تیرے بیٹے توں تاں تنخواہ نہیں منگی سی؟نواز شریف نے آکھیا کہ میرے تے شہباز شریف دے رشتے دے وچکار دراڑاں پان دی کوشش کیتی، آفرین اے شہباز شریف اُتے کہ اوہ جُھکے تے وِکے نہیں تے اپنے بھائی دے نال کھڑے رہے، مینوں اپنے بھائی اُتے فخر اے، شہباز شریف نوں آکھیا گیا کہ نواز شریف نوں چھڈن تے تُسی وزیراعظم بنو اوس اُتے میں گواہ ہاں کہ شہباز نے آکھیا میں ایسی وزارت عظمی نوںٹھوکر ماردا ہاں جس وچ بھائی نال بے وفائی کرنی پئے، اوہ جیل تک چلے گئے مگر اُف تک نہیں کیتی۔نواز شریف نے اپنی بیٹی مریم نواز نوں مبارک باد دتی تے آکھیا کہ مریم نے جیلاں کٹیاں، پارٹی نوں متحرک کیتا ہر امتحان وچ پورا اتریاں، حمزہ شہبازنوں سراہندا ہاں کہ جواں مردی دے نال جیل کٹی تے اُف تک نہ کیتی میرے سامنے اونہاں ہتھکڑیاں لا کے لے جایا گیا، شاہد خاقان عباسی نے میرے نال جیلاں کٹیاں تے اُف تک نہ کیتی۔اونہاں نے آکھیا کہ 1990 وچ جدوں حکومت بنائی تے وزیراعظم بنیا تے وَِچ لَتاںکھیچن والے نہ آندے تے ایتھے غربت تے بے روزگاری ناں دی چیز نہ ہُندی، 2017 وچ شیواں دی قیمتاں کیہ سن تے ہُن کیہ نیں؟