پلاسٹک بیگ دا استعمال ممنوع، صرف75مائیکرون بیگ چلے گا،مریم اورنگزیب

لہور(پنجابی میڈیا)پنجاب دی سینئر صوبائی وزیر مریم اورنگزیب نے آکھیا اے کہ اج توں صوبہ بھر وچ پلاسٹک بیگ دے استعمال نوں ممنوع قرار دے دتا گیا اے۔لہور دے نجی ہوٹل وچ منعقدہ اک تقریب نال خطاب کر دیاں ہو یاں سینئر صوبائی وزیر مریم اورنگزیب دا کہنا سی کہ اج توں صرف 75 مائیکرون دے بیگ استعمال کرن دی اجازت ہوئے گی، ہُن تُسی پلاسٹک نوں استعمال نہیں کرنا، اپنی عادت بدلنی پئی گی۔مریم اورنگزیب نے آکھیا کہ حکومت پالیسی دیندی اے صارفین اوس نوں اپناندے نیں، پلاسٹک موت اے نہ ایہ ضائع ہُندا اے نہ ختم ہُندا اے، جدوں ایہ سڑدا اے تے فضا وچ زہریلے دھواں چھڈ دا اے، جَد زمین وچ جاندااے تے زمین تباہ کر دیندا اے۔اونہاں نے ہور آکھیا کہ لہور دے شہریاں نوں سمجھنا ہوئے گا سموگ اُتے قابو پانا لازمی اے،اوہ ویلا دور نہیں جد لہور توں سموگ تے ہور شہراں تک پھیل جائے گی، جد تک سموگ نوں کنٹرول نہیں کراں گے ایہ کنٹرول نہیں ہوئے گی۔