قومی ٹیم جت کے آئے گی تے دعوت، ہار کے آئی تے ٹریننگ دیاں گے،مراد علی شاہ
کراچی(بیورورپورٹ)وزیراعلی سندھ مراد علی شاہ نے آکھیا کہ ٹیم جت کے آئے گی تے دعوت دیاں گے اگر ہار کے آئے گی تے ٹریننگ دیاں گے۔وزیراعلی سندھ مراد علی شاہ نے نواں ناظم آباد دی تقریب نال خطاب کر دیاں ہویاںآکھیا کہ عارف حبیب دا شکرگزارہاں، عارف حبیب نال32 ورھے پرانا تعلق اے، نویں ناظم آباد وچ ساریاں سہولتاں ہون گیان، نویں ناظم آباد وچ بوہت خوبصورت مسجد بنائی گئی اے۔مرادعلی شاہ نے آکھیا کہ جم خانے وچ جدید سہولتاں فراہم کیتیاں گئیاں نیں، عارف حبیب نوں سندھ حکومت ولوں مکمل تعاون دا یقین دلا ندا ہاں،اسیں پرائیویٹ سیکٹر دے نال مل کے فلائی اوور بنایا اے، عارف حبیب نوں نوا ناظم آباد دی مبارکباد دیندا ہاں۔وزیراعلی سندھ نے آکھیا کہ 2022 وچ سندھ اندر تباہ کن سیلاب آیا سی، 2022 والے سیلاب نے بوہت تباہی مچائی، سیلاب پاروں لو کاں دے کچے مکان ڈِگے، بلاول بھٹو نے سندھ حکومت نوںآکھیا سی لوکاں نوں گھر بنا کے دینے نیں۔اونہاں دا ہور کہنا سی کہ بلاول بھٹو دی ہدایت دے بعد 21 لکھ گھر بنا رہے ہاں، سوا لکھ گھر ایس ویلے مکمل ہوچکے نیں، روزانہ دی بنیاد اُتے1500 گھر بنا رہے ہاں، اگلے ورھے اسیں21 لکھ گھراں دی تعمیر مکمل کرلاں گے۔مرادعلی شاہ نے آکھیا کہ ساڈھے آئی ایم ایف نال مذاکرات جاری نیں، آئی ایم ایف دی اک ایہ وی شرط دی کہ امریکا توں میچ ہارنا اے، مرادعلی شاہ دی گل اُتے ہال وچ ہاساچھڑ گیا، اج اسیں بھارت نوں ہرانا اے، پاکستانی ٹیم لئی دعاواں نیں۔
