ہتک عزت قنون بننا ہی سی،ایس وچ پیپلز پارٹی دا کوئی حصہ نہیں:گورنر پنجاب سلیم حیدر

لہور( پنجابی میڈیا)گورنر پنجاب سلیم حیدر دا کہنا اے کہ ہتک عزت قنون وچ پیپلز پارٹی(پی پی) داکوئی حصہ نہیں اے، ہتک عزت بل آئین دی18 ویں ترمیم پاروں پاس ہویا۔دبئی وچ صحافیاں نال گل بات کر دیاں ہویاں گورنر پنجاب سلیم حیدر دا کہنا سی کہ پیپلز پارٹی دے ایم پی ایز نے ہتک عزت قنون دے موقع اُتے کارروائی دا بائیکاٹ کیتا سی تے میں بحیثیت گورنر بل نوںروکن لئی کوششں کیتی سی۔اونہاں نے آکھیا کہ میں بل اُتے دستخط نہیں کیتے سن،15دناں بعد ہتک عزت بل ازخود منظور ہو جانا سی۔گورنرپنجاب دا کہنا سی کہ پنجاب ہتک عزت قنون وچ پیپلزپارٹی دا کوئی حصہ نہیں اے لیکن ہتک عزت دا قنون بننا ہی سی، ہتک عزت بل 18ویں ترمیم پاروں پاس ہویا۔