اقتصادی سروے پیش:آئی ایم ایف دے سوا کوئی پلان بی نہیں اے،وزیرخزانہ

اسلام آباد(بیورورپورٹ)وفاقی وزیرخزانہ محمداورنگزیب نے اقتصادی سروے پیش کر دیاں ہویاںآکھیا اے کہ عالمی مالیاتی ادارہ (آئی ایم ایف)دے علاوہ کوئی پلان بی نہیں اے تے وزیراعظم ولوں کیتے گئے 9 مہینے دے پروگرام پاروں اج اسیں اہداف اُتے تبادلہ خیال کرن دی پوزیشن وچ ہاں۔وزیر خزانہ محمد اورنگزیب نے اسلام آباد وچ وزیر مملکت برائے خزانہ و توانائی علی پرویز ملک، سیکریٹری خزانہ امداد اللہ بوسال، سیکریٹری منصوبہ بندی دے ہمراہ پریس کانفرنس وچ آکھیا کہ2022 تے2023 وچ افراط زر دا سب نوں پتا اے، ایس سال روپے دی قدر 29فیصد گھٹ ہوئی تے زرمبادلہ 2 ہفتے دی گھٹ ترین سطح اُتے آگیا سی تے اوتھوں اسیں اپنا سفر شروع کیتا سی۔اونہاں نے آکھیا کہ ساڈھے مختلف ہدف نیں، جس اُتے گل کراں گے لیکن ایہ مذکورہ صورت حال ساڈھے سفر دی شروعات اے تے اج اسیں شہباز شریف دی قیادت وچ5 ورھے لئی منتخب حکومت وچ بیٹھے ہوئے نیں۔وزیرخزانہ نے آکھیا جدوں میں نجی شعبے توں وابستہ ساں اوس ویلے وی واضح سی کہ عالمی مالیاتی ادارہ (آئی ایم ایف)دے پروگرام وچ جانا چا ہیدا کیونکہ آئی ایم ایف دے علاوہ کوئی پلان بی نہیں اے اگر کوئی پلان بی ہُندا تے آئی ایم ایف نوں آخری امید نہ آکھیا جاندا۔اونہاں نے آکھیا کہ وزیراعظم نے9مہینے دا اسٹینڈ بائی ارینجمنٹ پروگرام لے کے حوصلہ افزا فیصلہ کیتا تے جیتھے اسیں اج ہاں اوس پاروں اوہی فیصلہ سی کیونکہ اگر اوہ پروگرام نہ ہندا اسیں اج ہدف دی گلاں نہ کر دے بلکہ ساڈھے ملک دی صورت حال بوہت مختلف ہندی تے اسیںمختلف گلاں کر رہے ہُندے تے اج جیہڑے اعدادوشمار نیں اوہ اسیں ڈسکس نہ کر رہے ہندے۔وفاقی وزیر خزانہ محمد اورنگزیب دا کہنا سی کہ مہنگائی دی شرح48 فیصد سیکم ہو کے11فیصد تک آگئی اے، چھیتی اک ہندسے اُتے وی آجائے گی، شرح سود بتدریج تھلے آنا چا ہیدا، مہنگائی گھٹ ہون دی وجہ نال ہی اسٹیٹ بینک نے شرح سود گھٹ کیتا اے۔وزیر خزانہ نے آکھیا کہ لارج اسکیل مینوفیکچرنگ دی گروتھ اُتے اثر پینا سی تے اوہ پئیا اے، مگر زرعی شعبے دی گروتھ حوصلہ افزا اے، ایف بی آر دی ٹیکس وصولیاں وچ30فیصد ودھا ہویا اے جیہڑا بے مثال اے۔اونہاں دا کہنا سی کہ پرائمری سرپلس رہیا اے تے ایس وچ صوبیاں نوں وی کریڈٹ جا ندا اے،کرنٹ اکانٹ خسارہ 6 ارب ڈالر دا تخمینہ لایا جا رہیا سی تے ایس ویلے صرف 200ملین ڈالر اے، ایس مالی سال دے دوران کجھ مہینے ساڈھا کرنٹ اکانٹ3فیصد سرپلس وچ وی رہیا اے، کرنسی مضبوط ہوئی اے اوس دی وڈھی وجہ نگران حکومت دے انتظامی اقدام نیں، نگران انتظامیہ نے ہنڈی حوالہ تے اسمگلنگ نوں روکیا گیا تے افغان ٹرانزٹ ٹریڈ دا جائزہ لیا گیا۔اونہاں نے آکھیا کہ اسٹیٹ بینک نے ایکسچینج کمپنیاں نوں لوڑ سن اوہ ودھان تے اسٹرکچرل کردار اے۔