سینیٹ وچ روایت دے برعکس کمیٹیاں دا چنائو ہویا،تحریک انصاف

اسلام آباد(بیورورپورٹ)رہنما تحریک انصاف شبلی فراز دا کہنا اے کہ سینیٹ وچ روایت دے برعکس کمیٹیاں دا چنائو کیتا گیا۔اسلام آباد وچ سینیٹر علی ظفر دے ہمراہ میڈیا نال گل بات کر دیاں ہویاں شبلی فراز دا کہنا سی کہ دنیا بھر دی پارلیمنٹ وچ کجھ قنون تے کجھ روایتاںنوں فالو کیتا جاندا اے، بدقسمتی نال سینیٹ وچ اج 2 کمیٹیاں دا چنائو کیتا گیا اوہ روایت دے برعکس ہویا ۔رہنما تحریک انصاف دا کہنا سی کہ روایت مطابق کمیٹیاں دی وِنڈ حکومت تے اپوزیشن وچ تقسیم ہُندی اے، مگر ایتھے معاملہ مختلف اے، حکومت اپنی پسند دی کمیٹیاں اپنے کول رکھ رہی اے۔پی ٹی آئی رہنما سینیٹر علی ظفر دا کہنا سی کہ پاکستان وچ آئین بحال نہیں اوس نوں بحال کرن دی کوشش کر رہے ہاں، اسیں الیکشن وچ حصہ ایس لئی لیا تاکہ جمہوریت آئین دی بالادستی ہو سکے۔اونہاں نے ہورآکھیا کہ اج کمیٹیاں دی تشکیل لئی روایت دی خلاف ورزی ہوئی ، ساڈھے کول سینیٹ اندر تے باہر احتجاج دے علاوہ کوئی آپشن نہیں رہ گیا۔