مالی سال 25-2024لئی پنجاب دا5ہزار446ارب روپے دا ٹیکس فری بجٹ پیش

لہور(پنجابی میڈیا)وزیر خزانہ مجتبی شجاع الرحمان نے نویں مالی سال25-2024 لئی پنجاب دا5ہزار446ارب روپے دا بجٹ پیش کر د تا، تنخواہواں وچ20 توں25فیصد تے پنشن وچ15فیصد وھا ہوئے گا۔سپیکر ملک احمد خان دی زیرصدارت پنجاب اسمبلی دااجلاس ہویا،ایس موقع اُتے وزیراعلی پنجاب مریم نواز شریف وی اسمبلی وچ موجود رہیاں۔وزیرخزانہ پنجاب مجتبی شجاع الرحمان نے بجٹ تقریر وچ دعوی کیتا اے کہ پہلا باضابطہ ٹیکس فری بجٹ پیش کیتا گیا اے، جدکہ حکومتی خرچے وی گھٹ کر رہے ہاں۔وزیر خزانہ پنجاب نے آکھیا کہ تنخواہ دارطبقہ مہنگائی نال بری طرح متاثر ہُندا اے، گریڈ 1 توں16تک ملازماں دی تنخواہ25فیصد تے پنشن 15فیصد ودھان دا فیصلہ کیتا اے، گھٹ توں گھٹ اجرت نوں32ہزار توں ودھا کے37 ہزار کرن دی تجویز اے۔وزیر خزانہ نے آکھیا کہ پنجاب دی ترقی شروع ہو چکی اے، مریم نواز نے 100دناں دے مختصر عرصہ وچ انقلابی اقدام کیتے، مریم نواز نے صوبے وچ مہنگائی نوں ریکارڈ گھٹ کیتا، مہنگائی دی شرح 11.8 فیصد اُتے لے آئے ہاں۔وزیرخزانہ پنجاب نے آکھیا کہ ملک وچ کاروبار دوست محول پیدا ہویا اے، ڈیجیٹل پنجاب دا خواب تیزی نال شرمندہ تعبیر ہو رہیا اے، پنجاب وچ کئی جگہاں اُتے مفت وائی فائی دی سہولت فراہم کیتی گئی اے۔پاکستان دے پہلے نوازشریف آئی ٹی سٹی دی بنیاد لہور وچ رَکھ دتی گئی اے، جرائم روکن لئی سمارٹ سیف سٹی پروگرام لئی3 ارب 80کروڑ روپے رکھے گئے نیں۔مجتبی شجاع الرحمان نے آکھیا کہ100یونٹ استعمال کرن والے بجلی صارفین نوں مفت سولر فراہم کراں گے، 5 مرلے تک گھر بنان والیاں نوں آسان قرضے فراہم کراں گے۔زراعت صوبائی وزیر خزانہ نے آکھیا کہ ساڈھی حکومت نے زرعی شعبے وچ پرانے طریقے نوں ترک کرن دا فیصلہ کیتا اے،ساڈھی حکومت نے کنک دی خریداری وچ بدعنوانیاں دا رستہ بند کر دتا اے۔مجتبی شجاع الرحمان نے آکھیا کہ زراعت لئی 64 ارب 60 کروڑ روپے جدکہ پنجاب کسان کارڈ لئی75 ارب روپے مختص کیتے گئے نیں۔صوبائی وزیر خزانہ نے آکھیا کہ 2 ارب 50 کروڑ دی لاگت نال انڈرگریجویٹ پروگرام دتا جائے گا۔اونہاں نے آکھیا کہ 3ارب دی لاگت نال صوبہ پنجاب دی پہلی گارمنٹس سٹی دا قیام عمل وچ لیایا جائے گا۔مجتبی شجاع الرحمان نے آکھیا کہ 7 ارب دی لاگت نال کھیڈا پنجاب پروگرام شروع کیتا جائے گا۔اونہاں نے آکھیا کہ 30 ارب دی لاگت نال چیف منسٹر ٹریکٹر پروگرام شروع کرن دی تجویز اے،9ارب 50 کروڑ دی لاگت نال وزیراعلی روشن گھرانہ پروگرام دا اجرا وی کیتا جائے گا۔مجتبی شجاع الرحمان نے آکھیا کہ 10 ارب روپے ’’اپنی چھت اپنا گھر ‘‘ لئی رَکھے گئے نیں۔وزیر خزانہ پنجاب نے آکھیا کہ بالاں دی ذہنی و جسمانی نشوونما لئی 1 ارب روپے رَکھے گئے نیں،296ارب روپے دی لاگت نال2380 کلومیٹر سڑکاں دی تعمیر و بحالی کیتی جائے گی۔مجتبی شجاع الرحمان نے آکھیا کہ وزیراعلی پنجاب دی ہدایت اُتے جنوبی پنجاب لئی ہر شعبے وچ خطیر رقم مختص کیتی گئی اے۔وزیر خزانہ پنجاب نے آکھیا کہ ایہ بجٹ عام آدمی دی مشکلاں گھٹ کرن دا ذریعہ اے، ایہ بجٹ خوشحالی تے ترقی دی منزل طے کرن دی نوید اے، اپوزیشن والے شور کر رہے نیں، پنجاب دے 13کروڑ لوکاں نوں پتا چلنا چا ہیدا اے۔اونہاں نے آکھیا کہ اپوزیشن ترقی کردا پنجاب نہیں ویکھنا چا ہندی، اپوزیشن والو تُسی5 ورھے شور ہی کردے رہوو گے،اسیں پنجاب نوں اک بہترین صوبہ بنا کے وکھاواں گے۔مجتبی شجاع الرحمان نے آکھیا کہ اج پنجاب وچ کوئی چور پرویز الہی، عثمان بزدار نہیں، مریم نواز دن رات خدمت کر رہیاں نیں، درست رستے اُتے چلن نال ترقی دے چراغ بلن گے۔پنجاب اسمبلی وچ اپوزیشن نے بجٹ پیش کرن اُتے شدید احتجاج کیتا، اپوزیشن لیڈر دی قیادت وچ اپوزیشن ارکان سپیکر ڈائس سامنے آگئے، اپوزیشن نے بجٹ دستاویزاںنوں پھاڑ کے ایوان وچ لہرایا، اپوزیشن نے پنجاب حکومت خلاف نعرے بازی کیتی، اپوزیشن نے مریم نواز دی موجودگی وچ ایوان وچ ہنگامہ آرائی کیتی، صحافیاں نے وی ہتک عزت قنون خلاف پریس گیلری توں احتجاجا واک آئوٹ کیتا۔ایس توں پہلاں وزیراعلی پنجاب مریم نواز دی زیر صدارت پنجاب کابینہ دا9 واں اجلاس منعقد ہویا، کابینہ نے اگلے مالی سال 25-2024 لئی 5446 ارب روپے دے بجٹ وی منظوری دتی، وزیر اعلی نے بجٹ دستاویز 2024-25 اُتے دستخط کر دتے۔پنجاب وچ پہلی وار ترقیاتی بجٹ نال 530 ارب دی غیر فعال سکیماں بند کر کے نویاں سکیماں شامل کیتیاں گیاں، نویں بجٹ وچ کوئی نوا ٹیکس نہیں لایا گیا، نہ ہی موجودہ ٹیکس دی شرح ودھی۔ٹیکس ودھائیوں بغیر مالیاتی ذرائع نال ریونیو وچ 53 فیصد دا ودھا کیتا جائے گا، بجٹ وچ 842 ارب روپے دے ڈویلپمنٹ خرچے، 630 ارب دا سرپلس بجٹ شامل اے، سالانہ ڈویلپمنٹ پلان وچ 77 نویں میگا پراجیکٹ شامل ہون گے۔ایس موقع اُتے پنجاب دی تریخ دے سب توں وڈھے ترقیاتی پیکیج دی وی منظوری دتی گئی، صوبائی کابینہ نے 842 ارب روپے دے ریکارڈ ترقیاتی بجٹ دی منظوری دتی، سابق ریونیو ہدف 625 ارب روپے جدکہ موجودہ ریونیو ہدف 960 ارب روپے مقرر کیتا گیا۔960 ارب ریونیو صوبہ اپنے ذرائع توں اکٹھا کرے گا، پنجاب نے گھٹ توں گھٹ اجرت 32ہزار توں وڈھاکے 37 ہزار روپے کرن دی منظوری دتی، تنخواہواں وچ 20 توں 25 فیصد تے پنشن وچ 15 فیصد ودھا دی منظوری دتی گئی۔مینارٹی ڈویلپمنٹ فنڈ وچ پہلی وار 1 ارب روپے دا ریکارڈ ودھا کیتا گیا، کنک دا قرض 375 ارب روپے دی ادائیگی دی منظوری، سود دی مد وچ 54ارب توں وَِدھ بچت ہوئے گی۔لیپ ٹاپ سکیم لئی 6 ارب روپے او پی کے ایل آئی انڈومنٹ فنڈ لئی 5ارب روپے دی منظوری دتی گئی، سوشل پروٹیکشن لئی 130 ارب روپے مختص کیتے گئے، 110ارب روپے دا ریکارڈ ودھا کیتا گیا۔پنجاب نے ایف بی آر ٹارگٹ توں 36 فیصد وَِدھ ٹیکس اکٹھا کیتا، 2023-24 بجٹ دی سپلیمنٹری گرانٹ لئی 268 ارب روپے منظور کیتے گئے، مالی سال-24 2023 دے سپلیمنٹری بجٹ اسٹیٹمنٹ دی منظوری دتی گئی۔زرعی آلات لئی 26 ارب، کسان کارڈ 10 ارب، سی ایم گرین ٹریکٹر پروگرام 30 ارب، سی ایم ڈسٹرکٹ ایس جی ڈی پروگرام لئی 80 ارب روپے دی منظوری دتی گئی۔لہور ڈویلپمنٹ لئی 35 ارب، مری لئی 5ارب، لائیو سٹاک کارڈلئی 2 ارب، ہمت تے نگہبان کارڈ لئی 2ارب، ری اسٹرکچرنگ ایجوکیشن لئی 26ارب روپے دی منظوری دتی گئی۔