بھارت دی ماحولیاتی جارحیت، لہور فضائی آلودگی دی زد توں باہر نہ آ سکیا

لہور: لہور فضائی آلودگی دی زد توں طاہر نہ آ سکیا، صبح دے ویلے آلودہ ترین شہر قرار پایا، سورج دیاں کرناں پھیلیاں تے سموگ وچ کمی آ گئی۔ لہور صبح دے ویلے اوسطاً 290ایئر کوالٹی انڈیکس دے نال آلودہ ترین شہر بن گیا پر جیویں سورج نے مکھڑا وکھایا تے فضائی آلودگی چھٹن لگی۔

دوپہر دے ویلے 323اے کیو آئی دے نال نئی دہلی آلودہ ترین شہر ٹھہریا۔ افغانستان دا دارالحکومت کابل 175 اے کیو آئی دے نال تیجے نمبر تے آ گیا۔ بھارتی شہر ممبئی 168دے نال پنجویں، کھٹمنڈو 166اے کیو آئی دے نال چھویں تے ڈھاکہ 162اے کیو آئی دے نال ستویں نمبر تے آ گیا۔بھارتی پنجاب وچ فصلاں دی باقیات نوں ساڑن نال فضائی آلودگی سرحد پار اپنا اثر وکھان لگی۔ واہگہ دے سرحدی علاقیاں وچ ایئر کوالٹی انڈیکس 348 تک جا اپڑیا۔ ایئر پورٹ دے لاگے 370، گلبرگ وچ 241، شملہ پہاڑی 450، سندر انڈسٹریل اسٹیٹ وچ 180اے کیو آئی ریکارڈ کیتا گیا۔ اپر مال 190، پنجاب اسمبلی 203، ڈی ایچ اے وچ 206اے کیو آئی ریکارڈ کیتا گیا۔ امریکی خلائی ادارہ ناسا ولوں جاری کیتیاں سیٹلائٹ تصویراں نے جنوبی ایشیا وچ آلودگی دی وجہ بنن والے بھارت نوں اک واری فیر بے نقاب کر دتا۔