نواز شریف صاحب غلط بیان دینا بندکردین،ڈاکٹریاسمین راشد

لہور(پنجابی میڈیا)تحریک انصاف دی رہنما ڈاکٹر یاسمین راشد نے آکھیا اے کہ نواز شریف صاحب غلط بیان دینا بند کر دین۔ڈاکٹر یاسمین راشد نے جیل توں اک ہور خط لکھ دتا جس وچ اونہاں نے نواز شریف تے مریم نواز اُتے شدید تنقید کر دیاں ہویاں آکھیا کہ اک پاسے اوہ سیاسی انتقام اُتے یقین نہ رکھن دی گلاں کر دے نیں تے دوجے پاسے اونہاں دی بیٹی نے پنجاب وچ بدترین مثال قائم کر رکھی اے۔خط وچ اونہاں دا کہنا سی کہ صنم جاوید تے عالیہ حمزہ نوں 10،10 وار گرفتار کیتا گیا، دوناں نوں پنجاب دیاں جیلاں گھمایاں جا رہیاں نیں،ایہ سیاسی انتقام نہیں تے ہور کیہ اے۔رہنما پی ٹی آئی نے خط وچ ہور لکھیا کہ امجد نیازی نوں رہائی دے بعد گرفتار کرنا وی سیاسی انتقام اے ساہیوال دے سینکڑاں کارکناں اُتے ایف آئی آر درج کرنا انتقام اے،6 وار وزیر رہن والے میاں محمود الرشید نوںہسپتال توں بغیر علاج جیل واپس گھل دتا۔اونہاں نے نواز شریف نوںمخاطب کر دیاں ہویاں لکھیا کہ تُسی اوہ ویلا کیوں بُھل گئے جدوں میں تہاڈے کول ہسپتال وچ بانی پی ٹی آئی عمران خان دا پیغام لیائی، اسیں تہاڈے لئی باہروں ڈاکٹر منگوان دی وی سہولت دتی۔ڈاکٹر یاسمین راشد نے بجٹ اُتے تنقید کر دیاں ہویاں لکھیا کہ بجٹ نال عوام دا لَک ٹٹ گئیا ایہ عوام توں سیاسی انتقام لیا گیا اے، چیف جسٹس پاکستان توں التجا اے کہ اے ٹی سی دے حالات اُتے نوٹس لین۔