لہور ہائیکورٹ داصنم جاویدنوں فوری رہا کرن دا حکم

لہور(پنجابی میڈیا)لہور ہائیکورٹ نے پی ٹی آئی کارکن صنم جاوید نوں گوجرانوالہ دے مقدمے وچ فوری طور اُتے جیل توں رہا کرن دا حکم دے دتا۔لہور ہائیکورٹ جسٹس اسجد جاوید گھرال دی سربراہی وچ 2رکنی بنچ نے صنم جاوید دی گوجرانوالہ دے مقدمے وچ گرفتاری خلاف درخواست اُتے14 صفحیاں اُتے مشتمل تحریری فیصلہ جاری کرد تا۔عدالتی فیصلے وچ لکھیا گیا کہ تفتیشی افسراں ولوں درخواست گزار نوں بار بار اک ہی نوعیت دے مقدمے وچ نامزد کرنا بدنیتی ظاہر کر دا اے ،درخواست گزار نوںرہائی دے بعد بار بار گرفتار کرن دا مقصد عدالتی نظام نوں شکست دینا اے۔عدالت نے تحریری فیصلے وچ آکھیا کہ ڈپٹی کمشنر لہور تے گوجرانوالہ نے جیل وچ ہون دے باوجود درخواست گزار دی نظر بندی دے احکامات جاری کیتے، ڈپٹی کمشنرز دے کردار سخت کارروائی دا کہندے نیں لیکن عدالت وڈھے پن دا مظاہرہ کر دیاں ہو یاں کوئی کارروائی نہیں کر رہی۔فیصلے وچ لکھیا گیا کہ عدالت اُمید کردی اے کہ ڈپٹی کمشنرز آئندہ مایوس نہیں کرن گے۔