لگدااے کہ9مئی مقدمے وچ مینوں ملٹری جیل گھلیا جائے گا،عمران خان

اسلام آباد(بیورورپورٹ)بانی پی ٹی آئی عمران خان نے آکھیا اے کہ مینوں لگدا اے کہ9مئی مقدمے وچ مینوں ملٹری جیل گھلیا جائے گا، اونہاں دا پلان اے کہ مینوں وی 9 مئی دے مقدمے وچ ملٹری جیل وچ سُٹن تے ملٹری کورٹ لے کر جان۔میڈیا دے مطابق 190 ملین پانڈ ریفرنس دی سماعت دوران میڈیا نال گل بات کر دیاں ہو یاں بانی پی ٹی آئی نے 9 مئی دے حملیاں دے تناظر وچ وضاحتی بیان دے دتا۔اونہاں نے آکھیا کہ میں آکھیا سی اگر مینوںگرفتارکیتا گیا تے جی ایچ کیو سامنے پُرامن احتجاج کراں گے لیکن میں کَدی کسی نوں توڑ پھوڑ تے پُرتشدد مظاہریاں دی اجازت نہیں دتی، 9 مئی دے واقعے دی سی سی ٹی وی فوٹیجز آئی ایس آئی نے چُرائیاں نیں۔اونہاں نے آکھیا کہ بیرسٹر گوہر تے حسن رئوف دی گرفتاری اُتے مذمت کردا ہاں۔عمران خان نے آکھیا کہ عطا تارڑدا دعوی اے کہ میں جیل دے وی آئی پی کمرے وچ ہاں اگر عطا تارڑ سچ بول رہیا اے تے آکے میرے نال ملے، میڈیا2 منٹ لئی آکے میرے کمرے دا دورہ کرے، ڈیتھ سیل تے اَت گردی دے مقدمے وچ گرفتار ملزماں دے سیل دی دیواراں میرے کمرے دے نال نیں۔اونہاں نے آکھیا کہ8 فروری نوں کور کرن لئی جھوٹ اُتے جھوٹ بو لیا جا رہیا اے، پی ٹی آئی دی مخصوص نشستاں دی ریویو پٹیشن اُتے چیف جسٹس پاکستان نوں بوہت چھیتی اے، چیف جسٹس توں کہندا ہاں کہ ساڈی25 مئی بارے پٹیشن اُتے سماعت کیوں نہیں ہو رہی؟ سب نوںپتا اے کہ سپریم کورٹ وچ ہُن یک طرفہ معاملہ چل رہیا اے،ساڈے کارکن ملٹری جیل وچ پئے ہوئے نیں، اونہاں دا پلان اے کہ مینوں وی 9 مئی دے مقدمے وچ ملٹری جیل وچ سُٹن تے ملٹری کورٹ لے کے جان۔عمران خان نے آکھیا کہ سرینا عیسی دے میرے خلاف بیان سوشل میڈیا اُتے پئے نیں، اخلاقی طور اُتے چیف جسٹس نوں ساڈے خلاف مقدمے نہیں سننے چاہیدے، وفاق پنجاب تے کے پی وچ اپنے پارلمینٹ ممبراں نوں بُھکھ ہڑتال کرن دا آکھاں گا۔اونہاں دا کہنا سی کہ توشہ خانہ ریفرنس وچ پرانے ملازم انعام شاہ تے کسٹم اپریزنوں وعدہ معاف گواہ بنایا گیا اے، نیب نے 1کروڑ 80 لکھ دے ہار دی قیمت 3 ارب 18 کروڑ روپے لائی سی، اسیں50 فیصد رقم ادا کر کے90 لکھ روپے وچ ہار خریدیا سی جیہڑا ساڈے کول موجود اے، اگر ایسا ہی اے تے نواز شریف تے آصف علی زرداری دے خلاف توشہ خانہ ریفرنساں دی سماعت کیوں نہیں ہو رہی؟ مینوں پتا اے کہ نیب نویں کیس دے بعد کوئی نوا تحفہ لیایاجائے گا۔اونہاں نے آکھیا کہ 9مئی دے مقدمے وچ وی میرے خلاف وعدہ معاف گواہ تیار کیتے جا رہے نیں، وزیر آباد وچ جد مینوں گولیاں ماریاں میں جنرل فیصل دا ناں لیا سی، اوس ویلے تے کسی نے احتجاج نہیں کیتا سی نہ توڑ پھوڑ ہوئی سی، 14مارچ نوں میرے گھر اُتے حملہ ہویا تے18 مارچ نوں جوڈیشل کمپلیکس وچ میرے اُتے اک ہور حملہ ہویا۔اونہاں نے آکھیا کہ پچھلے ورھے 14 مارچ نوں میرے وکیلاں نے یقین دہانی کرائی سی کہ اسیں کِدہرے نہیں جاواں گے تے تفتیش وچ تعاون کراں گے وکیلاں دی یقین دہانی دے باوجود رینجرز تے پلس گھر داخل ہوئی تے توڑ پھوڑ دی 18 مارچ نوں جوڈیشل کمپلیکس اسلام آباد پیشی دے موقع اُتے پلس دوبارہ میرے اُتے حملہ آور ہوئی،مینوں پتا لگ گیا سی ایہ مینوں گرفتار کرن گے، اپنی گرفتاری توں پہلاں کارکناں نوں جی ایچ کیو سامنے پرامن احتجاج دی کال دتی سی۔عمران خان دا کہنا سی کہ جد پارٹی چیئرمین نوں رینجرز اغوا کر کے لے جائے گی تے کارکن جی ایچ کیو سامنے ہی مظاہرہ کرن گے، اونہاں نے ساڈے پرامن احتجاج نوں بغاوت بنا دتا، اگرااسیں پُرامن نہ ہُندے تے یاسمین راشد جناح ہاوس دے باہر لوکاں نوں اندر جان توں نہ روکدیاں، 9 مئی واقعے دی سی سی ٹی وی فوٹیجز آئی ایس آئی نے چوری کیتی اے۔بانی پی ٹی آئی نے آکھیا اے کہ نواز شریف مگرمچھ دے اَتھرو بہا کے اپنی حکومت توں کہہ رہیا اے کہ مہنگائی کر دتی اے، نون لیگ نے اپنے دور حکومت وچ آئی پی پیز دے نال مہنگے معاہدے کیتے، آئی پی پیز دے نال مہنگے معاہدیاں پاروں بجلی دی قیمت کنٹرول توں باہر اے، ایہی لوگ آئی پی پیز نوں لے کے آئے سن تے ہُن ایہی کپیسٹی چارجز ادا کر رہے نیں ، نون لیگی حکومت ملکی تریخ دا سب توں وڈا کرنٹ اکائونٹ خسارہ ساڑھے 19 ارب ڈالر چھڈ کے گئی۔عمران خان نے آکھیا کہ ایہ کیسی جمہوریت اے کہ ساڈے پارٹی دے موجودہ چیئرمین تے ترجمان نوں گرفتار کر لیا گیا، بیرسٹر گوہر ساڈے ایم این ایز دے دستخطاں دی تصدیق کران الیکشن کمیشن جا رہے سن، میں پارٹی دے سینٹرل آفس اُتے پلس چھاپے تے گرفتاریاں دی مذمت کردا ہاں، اونہاں نے جمہوریت دی دھجیاں اڑا دتیاں نیں۔عمران خان نے آکھیا کہ سب نوں پتا اے ملک وچ کس دی حکومت اے سب جان دے نیں ملک عاصم منیر چلا رہیا اے، کے پی کے وچ ایس ویلے حالات قابو توں باہر نیں عوام دا پارہ ہائی اے۔صحافی نے سوال کیتا کہ تُسی بنوں واقعے اُتے فوج اُتے براہ راست فائرنگ دا الزام عائد کیتا لیکن خیبر پختون خوا حکومت نے تہاڈے بیان دے اُلٹ ریلیز جاری کیتی۔ اوس اُتے عمران خان نے آکھیا کہ میں جیل وچ ہاں مینوں کیہ پتا باہرکیہ ہو رہیا اے۔صحافی نے دوبارہ پچھیا کہ تُسی براہ راست فوج اُتے بنوں واقعہ دی فائرنگ داالزام عائد کیتا تہانوں ایسی انفارمیشن کون دیندا اے تہاڈے کول اوس دا کیہ ثبوت اے کیا تسی پاک فوج دے خلاف پروپیگنڈا کر رہے او؟سوال دا جواب دیندیاں ہوئے بانی پی ٹی آئی فوج دی براہ راست فائرنگ سے اپنے بیان توں مکر گئے آکھیا میں نے اوس توں وڈی گل کیتی اے کہ بنوں واقعہ اُتے جوڈیشل کمیشن قائم کر کے حقائق سامنے لیائے جان، مینوں جیل وچ 1 سزا قیدکیتی اے تے تے دُوجا جیل وچ پی ٹی وی ویکھن دی سزا دتی ہوئی اے۔صحافی نے سوال آکھیا کہ اکتوبر تک ملک وچ ٹیکنو کریٹ سیٹ اپ لیایا جائے گا کہ تُسی اوس دی سپورٹ کرو گے؟ ایس اُتے عمران خان نے آکھیا کہ ٹیکنو کریٹ سیٹ اپ لیان توں بہتر اے کہ ایہ ملک وچ سیدھا سیدھا مارشل لاء لادین ویسے وی ملک وچ غیر اعلانیہ مارشل لاء ہی نافذ اے۔عمران خان دا کہنا سی کہ ملکی معیشت دے بوہت برے حالات نیں ملٹی نیشنل کمپنیاں ملک چھڈ کے جا رہیاں نیں ساڈے پروفیشنل بیرون ملک منتقل ہو رہے نیں، جیہڑا سمجھدا اے کہ ملک نوں بحران توں کَڈن دا تے اوس دا حل ٹیکنوکریٹ سیٹ اپ وچ اے ووہ بے وقوف اے، ملک نوں موجودہ بحراناں توںکَڈن دا واحد حل صاف شفاف الیکشن نیں۔اونہاں نے آکھیا کہ محسن نقوی فراڈیا اے تے وائسرائے بنیا پھردا اے اوس دے پیچھے وڈے صاحب نیں، میں کوئی غلطی نہیں کیتی میں کسی توں معافی نہیں منگاں گا اوہ چاہندے نیںکہ ایہ میرے توں معافی مانگ۔صحافی نے سوال کیتا کہ چیف الیکشن کمشنر نوں جنرل (ر)فیض نے نون لیگ نال مل کے تعینات کروایا سی کیا ایہ سچ اے؟ ایس اُتے عمران خان نے آکھیا کہ جنرل فیض (ر)اوہی کردا سی جو اوس نوں قمر باجوہ کہندا سی مینوں یقین دلاندے سن کہ اسیںنیوٹرل ہاں، قمر باجوہ کمر وچ چھرا گھونپن دا ماہر سی، باجوہ دی اپنی ہی گیم سی ۔صحافی نے سوال کیتا کہ غیر ملکی جریدے وچ تہاڈا انٹرویو چھپیا اے ؟ ایس اُتے عمران خان نے آکھیا کہ میں اپنے لوکاں نوں پوائنٹ دَس دیندا ہاں اوس دی بنیاد اُتے انٹرویو چھپ گیا۔