عدالت دَسے کیا انصاف صرف پی ٹی آئی لئی اے؟عظمی بخاری

لہور(پنجابی میڈیا)صوبائی وزیر اطلاعات و رہنما مسلم لیگ ن عظمی بخاری نے آکھیا اے کہ عدالت دسے کیا انصاف صرف پی ٹی آئی لئی اے ؟لہور ہائیکورٹ دے باہر میڈیا نال گل بات کر دیاں ہویاں عظمی بخاری دا کہنا سی کہ اک نازیبا ویڈیو اُتے میری تصویر لا کے سوشل میڈیا اُتے اُچھا لیا گیا، میری تصویرنوں ٹوئٹر اُتے باقاعدہ طوراک پارٹی دے لوکاں نے وائرل کیتا، چیف جسٹس ہائی کورٹ لہور اک خاتون نیں، میں بطور صوبائی وزیر نہیں بلکہ اک خاتون دے طور عدالت توں انصاف لین آئی ہاں۔اونہاں نے آکھیا کہ کجھ 9مئی دی اَت گرد بہناں نوں ہیرو بنا کے پیش کیتا جاندا اے، پی ٹی آئی دیاں 2 عورتاں نویاں نویاں ہیروئن بنیاں نیں، 9 مئی دی اَت گرداںنوں آکھیا جا رہیا اے کہ ایہ قوم دی بیٹیاں نیں، اسیں وی قوم دی بیٹیاں ہاں، ساہنوں انصاف کون دیوے گا؟ عدالت توں پچھن آئی ہاںکہ کیا انصاف صرف پی ٹی آئی نوں ملنا اے یا کسی ہور لئی وی اے۔لیگی رہنما دا کہنا سی کہ ایتھے لہور ہائی کورٹ ہی بیٹھی ہاں، ویکھدی ہاں کتنی دیر وچ نمبر لگدا اے تے سنیا جاندا اے، قوم دی بیٹیاں صرف مخصوص پارٹی دی نیں یا باقی وی قوم دی بیٹیاں نیں؟ اسیں قنونی کارروائی کر دے ہاں تے اگے نہیں ودھن دتی جاندی۔