چیف جسٹس بارے بیان پاکستان دے آئین ودین نال کھلی بغاوت اے،احسن اقبال

اسلام آباد( بیورورپورٹ)وفاقی وزیر احسن اقبال نے آکھیا کہ چیف جسٹس آف پاکستان عدلیہ دے سربراہ نیں، عدلیہ اہم ریاستی ستون اے، چیف جسٹس بارے بیان پاکستان دے آئین ودین نال کھلی بغاوت اے، ایہ اوہ طبقہ اے جس نوں2018 وچ خاص مقصد لئی کھڑا کیتا گیا سی۔احسن اقبال نے آکھیا کہ ایہ اوہ کم اے جیہڑا اللہ نے روز قیامت کرنا اے، جیہڑا شخص لوکاں دے ایمان اُتے فتوے جاری کردا اے اوہ اللہ دے کم نوں اپنے ہتھ وچ لیندا اے، پاکستان وچ آئین ،عدالتاں تے قنون اے، کسی شخص یا گروہ نوں ایہ اجازت نہیں کہ اوہ کسی نوں قتل دے فتوے جاری کرے ، سزا تے جزا دا ریاست وچ اختیار صرف عدالت دے کول ہُندا اے۔احسن اقبال داکہنا سی کسی گروہ یا شخص نوں حق حاصل نہیں کہ اوہ کسی دے ایمان دا فیصلہ کرے، چیف جسٹس بارے معاملے اُتے قنونی کارروائی کیتی جائے گی تاکہ آئندہ ایسا نہ ہوئے۔