عمران خان دی اک وارفیر جی ایچ کیو دے باہر مظاہرے دی ہدایت دین دی تصدیق

راولپنڈی(بیورورپورٹ)پاکستان تحریک انصاف دے بانی چیئرمین عمران خان نے جی ایچ کیو دے باہر احتجاج دی تصدیق کر دیاں ہویاں اوس دی وضاحت وی جاری کردتی۔اڈیالہ جیل وچ بانی چیئرمین پی ٹی آئی دی صحافیاں نال غیر رسمی گل بات وچ عمران خان 9 مئی توں پہلاں جی ایچ کیو دے باہر احتجاجی مظاہرے دے بیان اُتے ڈٹ گئے تے وضاحت کر دیاں ہو یاں تصدیق کیتی کہ جی ایچ کیو دے باہر پرامن احتجاج دی کال دتی سی۔اونہاں نے آکھیا کہ جی ایچ کیو دے باہر مظاہرے دے میرے بیان نوں اینج پیش کیتا گیا جس طرح میں 9 مئی واقعے دااعتراف یا جرم کیتا ہوئے، جی ایچ کیو دے باہر پرامن احتجاج بارے میں تین وی لاگ وی کیتے جدکہ 12 وار پلس تفتیش وچ وی جی ایچ کیو دے باہر پرامن احتجاج دا کہہ چکیا ہاں۔عمران خان نے آکھیا کہ 14 مارچ نوں میرے گھر اُتے حملہ کیتا گیا،18 مارچ نوں جوڈیشل کمپلیکس دے باہرمینوںقتل کرن دا پلان سی ، جس دے میرے کول ثبوت موجود نیں، میں پارٹی نوں آکھیا سی کہ اگر فوج تے رینجرزمینوں گرفتار کرے تے تُسی جی ایچ کیو تے کنٹونمنٹ دے باہر جا کے پرامن احتجاج کرنا اے۔ایس اُتے صحافی نے سوال کیتا کہ تُسی پرامن احتجاج دی کال کیتی مگر 9مئی نوں پرامن مظاہرہ نہیں ہویا بلکہ توڑ پھوڑ تے جلا گھیرا ہویا سی۔ ایس سوال دا جواب د یندیاں ہویاں عمران خان نے آکھیا کہ احتجاج پرامن ایس لئی نہیں ہویا کہ اینہاں دا پہلاں توں ایہ پلان سی، سی سی ٹی وی فوٹیج ایس لئی سامنے نہیں لیا رہے کیونکہ ساڈے لوگ سی سی ٹی وی فٹیج وچ موجود نہیں تے ساڈی بے گناہی وی اوسی توں ثابت ہوجائے گی کیونکہ فوٹیج وچ تے کسی ہور دے چہرے نیں۔