اسیں فوج دے نال مذاکرات لئی تیار ہاں، عمران خان

اسلام آباد(بیورورپورٹ)سابق وزیر اعظم تے بانی پی ٹی آئی عمران خان نے آکھیا اے کہ اسیں فوجدے نال مذاکرات لئی تیار ہاں، فوج اپنا نمائندہ مقرر کرے اسیں مذاکرات کراں گے۔عدالت وچ صحافیاں نال غیر رسمی گل بات کر دیاں ہو یاں بانی چیئرمین پی ٹی آئی نے فوج نال مذاکرات کرن دی خواہش ظاہرکیتی تے آکھیا کہ اسیں فوج اُتے کَدی الزام نہیں لائے بلکہ اسیں تنقید کیتی اے۔عمران خان نے فوج نوںوِگڑے ہوئے بال توں تشبیہ دیندیاں ہو یاں آکھیا کہ گھر وچ کوئی وگڑیا ہویا بال ہوئے تو اوس اُتے تنقید کیتی جا ندی اے تے فوج اُتے تنقید ایس پاروں کیتی سی کیونکہ تنقید جمہوریت دا حسن اے۔صحافی نے سوال کیتا کہ تہاڈیاں اج کل دیاں گلاں توں لگ رہیا اے کہ تُسی فوج نال معاملات ٹھیک کرنا چا ہندے او لیکن تُسی ایس فوج تے اوس دے سربراہ اُتے الزام لائے؟جس اُتے عمران خان نے آکھیا کہ میں نے فوج اُتے کَدی الزام نہیں لائے صرف تنقید کیتی اے، ساہنوں ایہ نہ سکھان کہ فوج نے کَدی کوئی غلطی نہیں کیتی۔اونہاں نے آکھیا کہ ذوالفقار علی بھٹو دی سزا پیچھے جنرل ضیا سی تے سقوط ڈھاکا پیچھے جنرل یحیی خان دا ہتھ سی، تُسی اگر ظلم کراں گے تے کیا فوج اُتے تنقید بند کر د یئے۔صحافی نے سوال کیتا کہ تُسی فوج اُتے الزام لاندے او تے اونہاں نال ہی مذاکرات وی چاہندے او، سیاسی جماعتاں نال مذاکرات کیوں نہیں کر دے۔عمران خان نے آکھیا کہ ایس آئی ایف سی کیہ اے تے محسن نقوی کون اے؟ ملک وچ غیر اعلانیہ مارشل لا نافذ اے تے محسن نقوی اونہاں دا تے نمائندہ اے، اوہ ایتھے اونہاںدے ذریعے پہنچیا۔ محمود خان اچکزئی نوںاسیں مذاکرات دا مینڈیٹ د تا سی لیکن دُوجے پاسے کوئی ناں سامنے آندا تے اسیں گل بات کر دے۔سوال کیتا گیا کہ ایسیاں گلاں سامنے آرہیاں نیں کہ تسی تے تہاڈی پارٹی دے کجھ لوگ محمود خان اچکزئی اُتے بھروسہ نہیں کر دے؟ عمران خان نے آکھیا کہ محمود خان اچکزئی اُتے ساڈا پورا بھروسہ اے۔صحافی نے سوال کیتا کہ تُسی کہندے او کہ محسن نقوی اونہاں دا نمائندہ اے، اگر ایدھروں محسن نقوی نوں مذاکرات دا اختیار دتا جائے تے تُسی مذاکرات کرو گے؟ اونہاں نے آکھیا کہ محسن نقوی نال کَدی گل نہیں کراں گا، اوس نے آئی جی پنجاب نال مل کے ساڈے لوکاں اُتے ظلم کیتا، ایہ ظل شاہ دی موت دے ذمہ دار نیں،ایہ بیرون ملک کِدھرے نہیں جا سکے گا، باہر ملکاں وچ تشدد نال نفرت کیتی جا ندی اے۔عمران خان نے آکھیا کہ مریم نواز فاشسٹ اے اوہ باپ دے چوری دے پیسیاں اُتے اینج پلی اے جسطرح شہزادی ہوئے ، مریم نواز نے آئی جی پنجاب نوں ایسی لئی رکھیا ہویا اے کہ اوس نے پی ٹی آئی اُتے ظلم کیتا اے۔سابق وزیراعظم نے آکھیا کہ مذاکرات لئی پہلا مطالبہ اے چوری کیتا گیا مینڈیٹ واپس کیتا جائے، مذاکرات لئی دُوجا مطالبہ گرفتار کارکن رہا تے مقدمے ختم کیتے جان جدکہ تریجا مرحلہ ملک بچان دا اے جیہڑا صاف شفاف الیکشن دے بغیر ممکن نہیں۔ مولانا فضل الرحمن نے اسمبلیاں توں استعفے دی جیہڑی گل کیتی اے اوہ تریجے مرحلے دی گل کر رہے نیں۔عمران خان نے آکھیا کہ جماعت اسلامی دے دھرنے دی مکمل حمایت کردا ہاں،ساڈی پارٹی ایس دھرنے وچ بھرپور رَلت کرے گی تے پارٹی لیڈر شپ نوں آکھاں گا کہ اج ہی جماعت اسلامی دے دھرنے وچ شامل ہون۔ حالات ایہ نیں کہ میرے جیل دے کمرے دی صفائی کرن والے دا بل 40ہزار آیا اے، بجلی دے بلاں تے ٹیکسساں وچ ہوشربا ودھا اُتے جماعت اسلامی دے موقف دی حمایت کردا ہاں۔اونہاں نے آکھیا کہ لاپتہ افراد دی بازیابی لئی نکلن والے بلوچ عوام دی وی حمایت کردا ہاں، بلوچستان وچ لوکاں نوں غائب کرنا ظلم اے، حکومتی ہوش کرے تے بلوچ عوام وچ بوہت زیادہ نفرت پھیل رہی اے۔ساڈے 25 ورکر اجے تک غائب نیں، سوشل میڈیا ایکٹوسٹ احمد جنجوعہ نوں گھروں گرفتار کرکے اَت گرد بنا دتا گیا اے۔عمران خان نے آکھیا کہ میں چیف جسٹس اسلام آباد ہائیکورٹ عامر فاروق دے خلاف ریفرنس دائر کیتا اے، جسٹس عامر فاروق مینوں ٹیریان کیس وچ پھنسانا چاہندا سی، میرے تے گھر والی دے سارے کیس عامر فاروق کیوں سن دا اے؟ مینوں جوڈیشل کمپلیکس توں اغوا کیتا گیا تے عامر فاروق نے اوس نوں درست قرار دتا۔ عامر فاروق توں گزارش اے کہ انصاف دے اصولاں تحت میرے مقدمیاں توں وِکھ ہو جائے، ہائیکورٹ وچ ہور وی جج نیں کسی ہور نوں کیسز دے دین۔بانی پی ٹی آئی نے آکھیا کہ 9مئی واقعات وچ ساڈی بے گناہی سی سی ٹی وی وچ چھپی اے، اگر 9مئی وچ پی ٹی آئی دا کوئی بندہ ملوث اے تے اوس نوں ضرور سزا دین، 28سالہ جدوجہد وچ کَدی توڑ پھوڑ دی گل نہیں کیتی۔ ساری پارٹیاں جلسے کر رہیاں نیں لیکن ساہنوں جلسہ کرن دی اجازت نہیں دتی جا رہی، اجے صوابی وچ جلسہ کر رہے ہاں تے اگلا جلسہ اسلام آباد وچ کراں گے، اسیں نہیں چا ہندے کہ انتشار ہوئے ۔عمران خان نے آکھیا کہ حکومت توںاسیں کیہ مذاکرات کر یئے، پی پی پی تے ن لیگ دونوں فارم 47 والے نیں، حکومت دا اک ہی مقصد اے پی ٹی آئی تے فوج دی لڑائی لڑوا کے ساڈی جماعت ختم کروان۔ ایہ دونوں جماعتاں سمندر وچ ڈوب رہیاں نیں تے جُتیاں دے سہارے لٹک رہیاں نیں جس اُتے9مئی دا ٹیگ لگیا اے۔اونہاں نے آکھیا کہ نیب پراسیکیوٹر توں پچھلے دناں منگی گئی معافی توں بانی پی ٹی آئی مکر گئے۔ اونہاں نے آکھیا کہ میں نیب پراسیکیوٹر توں معافی نہیں منگی ایہ آکھیا سی کہ تہاڈے توں کوئی مسئلہ نہیں، نیب والے نااہل نیں یا بے ضمیر نیں، نیب پاروں میں اک سال توں جیل وچ ہاں، جس آدمی نوں گھروں کِڈیا اوسی نوں میرے خلاف وعدہ معاف گواہ بنا دتا گیا، میرے اُتے 200 مقدمات درج کرن اُتے دنیا اینہاں دا مذاق اڑا رہی اے۔بانی پی ٹی آئی نے آکھیا کہ چوہدری پرویز الہی نے بڑیاں مشکلاں دا سامنا کیتا، اونہاں دیاں 3پسلیاں ٹٹیاں، میں اوس دی تعریف کردا ہاں۔ وَدھ جج اپنے مرضی دے فیصلیاں لئی تعینات کیتے جا رہے نیں۔