اَت گردی خلاف جنگ وچ پلس نے اول دستے دا کردار ادا کیتا،وزیراعظم
اسلام آباد(بیورورپورٹ)وزیر اعظم محمد شہباز شریف نے آکھیا اے کہ اَت گردی خلاف جنگ وچ پلس نے اول دستے دا کردار ادا کیتا۔یوم شہدائے پلس دے موقع اُتے اپنے پیغام وچ وزیراعظم محمد شہباز شریف دا کہنا سی کہ پلس دے شہید افسراں تے اہلکاراں نوں خراج عقیدت پیش کر دے ہاں، اج بہادر پلس افسراں تے اہلکاراں دی جرات و بہادری نوں یاد کرن دا دن اے جنہاں نے جرائم دی سرکوبی کر دیاں ہو یاں اپنیاں جاناں دا نذرانہ پیش کرن والے پلس اہلکاراں دی قربانیاں لازوال نیں۔اونہاں نے آکھیا کہ اَت گردی خلاف جنگ وچ پلس نے ہمیشہ ہراول دستے دے طور اُتے اپنی ذمہ داریاں نبھائیاں، پلس اہلکاراں نے ہمیشہ اپنی جاناں دا نذرانہ دے کے قوم دا مستقبل محفوظ تے روشن بنایا،شہدائے پلس قوم دا فخر نیں، پوری قوم شہید پلس اہلکاراں نوں سلام پیش کر دی اے۔محمد شہباز شریف دا کہنا سی شہید افسراں تے اہلکاراں دے خانداناں دا خیال رکھنا حکومت دی ذمہ داری اے، ایس حوالے نال کوئی کوتاہی نہیں ہون دیاں گے، وفاقی حکومت شہداء دے بالاں دی تعلیم و صحت لئی ہر ممکن اقدام کرے گی، شہداء دے خانداناں دا ہر طرح توں خیال رکھیا جائے گا۔وزیر اعظم نے ہور آکھیا کہ بطور وزیر اعلی پنجاب اپنے دور وچ شہدائے پلس دے خانداناں لئی اک وڈا تے تریخی پیکیج دتا سی۔
