چین آئرن برادر ملک، دوستی تے تعلقات اُتے کوئی سمجھوتہ نہیں ہوگا،وزیراعظم

لہور(پنجابی میڈیا)وزیراعظم محمد شہباز شریف نے آکھیا اے کہ چین پاکستان دا آئرن برادر اے، چائنہ دے نال دوستی تے تعلقات اُتے کوئی سمجھوتہ نہیں ہوئے گا۔وزیراعظم شہباز شریف نال چائنہ پبلک ڈپلومیسی ایسوسی ایشن دی دعوت اُتے چین دا دورہ کرن والے سینئر صحافیاں دے وفد نے ملاقات کیتی،سینئر صحافیاں دے وفد نے وزیراعظم نوں دورہ چین دی کامیابی توں آگاہ کیتا۔سینئر صحافیاں وچ سلمان غنی، عامر میر، شیراز حسنات، خضر گوندل، خالد حسنین، اعظم ملک تے مطیع الرحمان شامل سن، صحافیاں دے 7رکنی وفد نے چینی حکومت دی دعوت اُتے بیجنگ، شن جنگ تے گوانگ ژو دا دورہ کیتا سی ۔ایس موقع اُتے گل بات کر دیاں ہو یاں وزیراعظم شہباز شریف دا کہنا سی کہ اپنے حالیہ دورہ چین وچ اہم مقصد حاصل کیتے نیں، چین نوں باضابطہ طور اُتے پاکستانی قرضیاں نوں5ورھیاں لئی ری شیڈول کرن دی درخواست دی اے، امید اے چینی حکومت ساڈی درخواست اُتے مثبت ردعمل دا اظہار کرے گی۔اونہاں نے آکھیا کہ مہنگائی تے بجلی دے مسائل توں بخوبی واقف ہاں، آئی پی پیز بارے ترجیحات دا جائزہ لے رہے ہاں، 200 یونٹس تک بجلی استعمال کرن والیاں نوں ریلیف د تا، اگلے کجھ عرصے وچ چین دی کئی کمپنیاں پاکستان وچ سرمایہ کاری کرن گیاں۔شہباز شریف دا کہنا سی کہ چینی عوام دی ترقی اونہاں دی یکجہتی وچ پنہاں اے، پاکستانی عوام نوں وی معاشی ترقی دے ہدف حاصل کرن لئی مٹھی ونگوں یکجا ہون پئے گا، پاکستان وچ کم کرن والے چینیاں دی سکیورٹی اُتے کوئی سمجھوتہ نہیں ہوئے گا۔وزیراعظم نے ہورآکھیا کہ چینی باشندیاں دی حفاظت اُتے حکومت تے ادارے اک پیج اُتے نیں، ایس نوں اپنی ذمہ داری سمجھدے نیں، سی پیک جاری اے تے جاری رہے گا، ساڈی کوشش اے کہ سی پیک دے منصوبیاں نوں اپنی حکومت دے دور وچچھیتی توں چھیتی مکمل کریئے۔