بانی پی ٹی آئی اقتدار دے منگتے نیں،مریم اورنگزیب

لہور(پنجابی میڈیا)پنجاب دی سینئیر وزیر مریم اورنگزیب دا کہنا اے کہ بانی پی ٹی آئی اقتدار دے منگتے نیں۔سینئیر وزیرپنجاب مریم اورنگزیب نے بیان وچ آکھیا کہ بانی پی ٹی آئی عمران خان بہروپیے نیں تے این آر او دی بھیک منگ رہے نیں جیہڑا کہ نہیں مل رہیا۔ بانی پی ٹی آئی ہُن خود سب توں وَڈھے غلط فہمی دا شکار نیں سب اونہاں دی اصلیت سمجھ چکے نیں۔ عمران خان اقتدار دے منگتے نیں۔مریم اورنگزیب نے آکھیا کہ مکار بہروپئے نے جھوٹ بول کے4 ورھے عوام نوں غلط فہمیاں دا شکار بنایا۔ کَدی سائفر لہرا دے تے کَدی امریکا دا ناں لے کے۔ عمران خان رون، چیخن یا پیٹن این آر او نہیں ملے گا نہ ہی کیس ختم ہون گے۔ اونہاں نوں جواب دینا پئے گا۔سینئیر وزیر پنجاب دا ہور کہنا سی کہ9مئی تے ائیربیس اُتے حملہ کس فرد دے خلاف سی۔ کرنل شیرخان دا مجسمہ توڑنا ، فوجی تنصیبات، قائد اعظم ہائوس تے ریڈیو پاکستان اُتے حملہ کس فرد دے خلاف سی۔ جی ایچ کیو اُتے حملہ ادارے دے خلاف نہیں تے کس فرد دے خلاف سی؟ ملک دے ڈیفالٹ، معیشت دی تباہی تے مہنگائی دا طوفان لیانا کس فرد دے خلاف سی؟