اسٹیبلشمنٹ نال کوئی رابطہ نہیں جد وی گل بات ہوئے گی ملک لئی ہوئے گی،عمران خان

اسلام آباد(بیورورپورٹ)بانی پی ٹی آئی عمران خان نے آکھیا اے کہ صرف بھیڑ بکریاں ڈںڈوں نال کنٹرول ہُندیاں نیں انسان نہیں، ملک نوں مضبوط ادارے دی لوڑ اے ایہ جو کر رہے نیں ایہ خودکشی اے۔راولپنڈی اڈیالہ جیل وچ 190 ملین پانڈ کیس دی سماعت دے بعد میڈیا نال غیر رسمی گل بات وچ اونہاں نے آکھیا کہ میرا اسٹیبلشمنٹ نال کوئی رابطہ نہیں اے، اسٹیبلشمنٹ نال جدوں وی گل ہوئے گی ملک تے قنون لئی ہوئے گی۔اونہاں نے آکھیا کہ عوام فوج نال پیار کردی اے کیونکہ اوہ سانوں ڈیفنڈ کردے نیں، مینوں جس کمرے وچ رکھیا گیا اے اوہ اوون اے اوس دے باوجود مینوںکوئی ریلیف نہیں چاہیدا۔اونہاں نے آکھیا کہ بنگلہ دیش وچ عوام باہر نکلی تے اپنا حق لیا، صرف بھیڑ بکریاں ڈںڈوں نال کنٹرول ہندیاں نیں انسان نہیں، اپیل اے فوج سب دی اے، ملک نوںمضبوط ادارے دی لوڑاے، ایہ جو کر رہے نیںایہ خودکشی اے۔عمران خان دا کہنا سی کہ چیئرمین پی سی بی نے آکھیا کرکٹ ٹیم نوں سرجری دی لوڑ اے تے ہُن اسیں بنگلا دیش توں ہار گئے ایہ سارا نزلہ اک ادارے اُتے پہ رہیا اے محسن نقوی دی کیہ کوالیفکیشن اے جیہڑا اوس نوں وزیر داخلہ تے چیئرمین پی سی بی بنا د تا؟ ایہ 2008 دا نیب زدہ اے۔چیئرمین پی ٹی آئی نے آکھیا کہ میرے نال تعینات اسٹاف نوں چوتھی وار تبدیل کیتا گیا اے، مینوں کجھ ہویا تے ذمہ دار ڈی جی آئی ایس آئی تے جنرل عاصم منیر ہون گے، جیل وچ کجھ زیادہ ہی سختیاں ہو رہیاں نیں لگدا اے ’’ان کی کانپیں ٹانگ رہی ہیں‘‘۔اونہاں نے ہور آکھیا کہ بشری دے کمرے وچ چوہے آچکے نیں، اوہ نماز پڑھدیاں نیں تے چوہے چھت توں ڈِگدے نیں، اج عدالت نوں آگاہ کیتا اے تاکہ چوہے ختم ہوسکن ایسی طرح مینوں اوون نما کمرے وچ رکھیا گیا ہے۔