درختاں دی کٹائی وچ ملوث ملازماں، افسراں نوں نوکریاں توںکَڈ دینا چا ہیدا ے،چیف جسٹس
اسلام آباد(بیورورپورٹ)چیف جسٹس پاکستان جسٹس قاضی فائز عیسی نے آکھیااے کہ درختاں دی کٹائی وچ ملوث ملازماں، افسراں نوں نوکریاں توںکَڈ دینا چا ہیدا اے۔چیف جسٹس قاضی فائزعیسی دی سربراہی وچ سپریم کورٹ دے 3 رکنی بنچ نے مردان وچ شیشم دے قیمتی درختاں دی کٹائی بارے کیس دی سماعت کیتی۔عدالت نے ریجنل آفیسر مردان فارسٹ ڈویژن مہر بادشاہ دی نوکری توں برخاستگی، جرمانہ دی سزا برقرار رکھدیاں ہو یاں اپیل خارج کردتی۔سپریم کورٹ نے خیبرپختونخوا حکومت توں محکمہ جنگلات دے5سالہ بجٹ، محکمہ جنگلات دے ملازماں تے خیبرپختونخوا وچ اجازت دے نال تے غیر قنونی طور اُتے کَٹے گئے درختاں دی تفصیل منگ لئی۔عدالت عظمی نے خیبرپختونخوا وچ جنگلات اُگان دے معاملے اُتے وی5سالہ تفصیل منگ لئی اے۔سماعت دوران عدالت نے ریمارکس د تے کہ تیزی دے نال جنگلات نوں کٹے جانے دا معاملہ انتہائی سنگین اے، ملی بھگت نال جنگلات دی کٹائی ہو رہی اے۔جسٹس قاضی فائزعیسی نے ہور ریمارکس د تے کہ درختاں دی کٹائی وچ ملوث ملازماں تے افسراں نوں نوکریاں توں کَڈ دینا چا ہیدااے، محکمہ جنگلات دا جنگلات بچان دی بجائے چائے پانی دا کم رہ گیا اے۔بعد وچ سپریم کورٹ نے کیس دی سماعت اک مہینے تک ملتوی کردتی۔
